اؤتن مؤوسوم‌ده گونئی آذربایجانین «تراختور» فوتبول کومانداسین‌دا اوینایان ایرلان‌دییالی هوجوم‌چو آنتونی ایستوکئس فیفا-نین «تراختور» کلوبو حاق‌دا قرار قبول ائتدیینی بیلدیریب.

آخار. آذ خبر وئریر کی، آنتونی ایستوکسین «تراختور» کلوبو ایله ۳ ایللیک مقاویله‌سی اولدوغو حال‌دا، او ۱۹-جو سوپر لیگا یاریشلاریندا تبریزه قاییتمادی. قیسا مدت بیر تورکییه کومانداسینا قوشولان فوتبولچو سونرالار تهرانین «پرسپولیس» کلوبو ایله مقاویله ایمضالادی.

«تراختور» کلوبو ایرلاندییالی فوتبولچودان شیکایت ائتدیینی بیلدیره‌رک اونونلا مقاویله ایمضالایان «پرسپولیس» کلوبونا دا خبردارلیق ائتمیشدیر. لاکین کلوبون فوتبولچودان شیکایتی هئچ بیر نتیجه وئرمه‌ییب.

حاضردا «پرسپولیس»ده اوینایان هجوم‌چو صحیفه‌سین‌ده پایلاشدیغی پوست‌دا فیفا-نین «تراختور» کلوبو باره‌ده گؤزلنیلمز قرار وئردیینی آچیقلاییب. حؤکمه اساساً آذربایجان کلوبو ۴۵ گون عرضین‌ده ۴۰۰ مین دلار آنتونی ایستوکسه اؤد‌مه‌لیدیر. کلوب حتی اؤدنیشین بیر ایل مدتینه گئجیکدیی اوچون ۵ فایز ده جریمه اؤد‌مه‌لیدیر.

فیفا-نین چیخاردیغی حکم‌ده وورغولانیب کی، کلوب قید اولونان مبلغی تعیین اولونموش مدتده اؤدمیجیی تقدیرده ۲ ترانسفر پنجره‌سیندن محروم ائدیله‌جک.