بو گون تبریزین "تراکتور" فوتبول کلوبونون تاسیس ائدیلمه‌سیندن ۵۴ ایل اؤتور.

Axar.az خبر وئریر کی، "تراکتور" ۱۹۷۰-جی ایلین بو گونو تاسیس ائدیلیب.

تبریزین او واختکی ان بؤیوک زاوودلاریندان بیری اولان تراکتور زاوودو نزدینده یارادیلیب، ۲۰۱۱-جی ایلده‌ن مستقل کلوب‌دور.

بو کلوب اؤز تاریخین‌ده کریم باقری، سیروس دین محمدی، حسین خطیبی، رسول خطیبی، احد شیخ‌لاری، حسین قوی‌فکر، غلامرضا باغ‌آبادی، امیر داداش ضیایی و س. کیمی مشهور فوتبول‌چولار یئتیشدیریب.

"تراکتور" ۱۹۷۵-جی ایلده ایرانین تخت‌جمشید آدلی بیرینجی دیویزیون چمپیوناتینا یوکسلیب. همین ایل ۱۶ کلوب آراسیندا ۱۶-جی یئری توتوب و ایکینجی دیویزیونا دوشسه ده، ۱۹۷۷-جی ایلده یئنه بیرینجی دیویزیونا یوکسه‌له بیلیب و ۵-جی یئری توتوب.

ایران اسلام انقلابی و ایران-عراق محاربه‌سی سببی ایله ۱۹۷۹-جو ایلده‌ن ۱۹۸۸-جی ایلدک ایران فوتبول لیگاسی باغلاندیغی و تکجه ایالت چمپیوناتلاری کئچیریلیردیی اوچون "تراکتور" تبریز لیگاسین‌دا اویناییب.

بو دورون سون ایللرینده رومینیالی مشق‌چی واسیلی قوجا کلوبون باش مشق‌چی‌سی تعیین اولونوب. واسیلی قوجا "تراکتور" کومانداسیندا کؤکلو و اساسی ایشلر گؤروب.

بو ایشلر "تراکتور"ده بؤیوک دییشیکلره و اوغورلو ناعلیتلره سبب اولدو. تراکتور ۱۹۹۲-جی ایلده ایرانین آزادگان آدلی بیرینجی دیویزیونوندا ۳-جو اولدو. بو ایسه او واختا کیمی "تراکتور"اون ایرانین بیرنیجی دیویزیونوندا ان یاخشی نتیجه‌سی ایدی.

"تراکتور" فوتبول کلوبو ایران فوتبول لیگاسین‌دا ۳ دفعه ایکینجی، ایران فوتبول کوبوکوندا ۲ دفعه چمپیون، ۳ دفعه ایکینجی، ایران فوتبولو سوپر کوبوکون‌دا ۱ دفعه ایکینجی و بیر دفعه چئمپیون اولوب.

بونونلا یاناشی هیندیستانین میلس کوبوکوندا ۱ دفعه چمپیون اولان "تراکتور"، "سرداران شهید آذربایجان" کوبوکوندا دا ۱ دفعه چمپیون و ۱ دفعه ایکینجی اولوب.

۲۰۱۹-جو ایلین مارت آیین‌دان اعتباراً کلوبون منجرلری و صاحبلری کلوبون آدینی دییشمه‌یه چالیشیبلار و نهایت، منجرلرین سعیی و شرقی آذربایجان ایدمان و گنجلر باش اداره‌سینین، فیفا-نین تصدیقی ایله ۲۲ ایون ۲۰۱۹-جو ایلده تبریز تراکتور کلوبونون آدی دییشدیریله‌رک "آذربایجان تراکتور کلوبو"نا دییشدیریلیب.

آسییا فوتبول کنفدراسیاسینین (آفج) ۲۰۲۰-جی ایلده ایران کوماندالاری آراسین‌دا اینترنت سورغوسونا اساساً، "تراکتور" کلوبو ان پوپولیار و ان چوخ آزارکشی اولان ایران کومانداسی کیمی تانینیب. آفج-نین جنوبی و مرکزی آسیا کومان‌دالاری آراسیندا آپاردیغی دیگر سورغودا ایسه "تراکتور" فوتبول کومان‌داسی ۴۳،۵۹% سس توپلایاراق جنوبی و مرکزی آسییانین ان پوپولیار و آزارکشلرین بیندیی کوماندا سئچیلیب.

"تراکتور"اون کئچمیش پورتقالیالی مشق‌چی‌سی آنتونیو خوسه کونسیساو اولیویرا مئدیایا وئردیی مصاحیبه‌سینده تبریز کلوبونون آزارکشلرینین کوماندایا دستیینده حیرته گلدیینی و باشقا هئچ بیر کلوبا بئله دستک وئریلدیینین شاهدی اولمادیغینی دئییب.

"تراکتور"و تبریز و باشقا شهرلرده کئچیردیی قارشیلاشمالاردا اون مینلرله طرفدار دستکلییر و اونلار ان چوخ آشاغی‌داکی شعارلاری سسله‌ن‌دیریرلر:

یاشاسین آذربایجان!

یئل یاتار، توفان یاتار، یاتماز تیراختور بایراغی

آذربایجان وار اولسون، ایسته‌مه‌یه‌ن خار اولسون!

آذربایجان یوردوموز، تیراختور بوزقوردوموز!

تورک دیلینده مدره‌سه، اولمالی‌دیر هر کسه!

بونونلا یاناشی خصوصاً سون للر "تراکتور" فوتبول کلوبون‌دان داها چوخ ایران‌دا یاشایان تورکلرین، خصوصاً گونئی آذربایجان‌لیلارین کیم‌لیک سیمووللاریندان بیرینه چئوریلیب.

اونون قارشیلاشمالاریندا آذربایجانین اطراف محیطی، خصوصاً اورمیا گؤلو، آنا دیلی، میلی حاقلار و باشقا حقوقلارلا باغلی طلبلر ایر‌لی سورولور، شعارلار سسلندیریلیر.

"تراکتور"اون حاضرکی صاحبی محمدرضا زونوزی اصلن شرقی آذربایجان ایالتینین زونوز شهریندن اولان تانینمیش ایش آدامیدر

ایران حکومتینین، خصوصاً سپاه کوماندیرلرینین "تراکتور" اوزرینده‌کی نظارت و یاراتدیقلاری مانعه‌لر، همچینین کلوبا دولت دستیینین اولماماسینا باخمایاراق، او، یئنه ده آذربایان‌لیلارین اکثریتینین سئویب و دستکلدیکلری ایلک کلوبدور.

بونا گؤره ده، ایران پرزیدنتی مسعود پزشکیان سئچکی قاباغی تبلیغات کامپانییاسیندا آذربایجان‌لیلارا وئردیی وعدلر سیاهی‌سینا "تراکتور" کلوبونون پروبلملرینین حل ائدیلجیی ایله باغلی بند ده علاوه ائتمیشدی.

قید ائدک کی، "تراکتور"اون سون اویونو نویابرین ۲۷-ده آسیا چمپیونلار لیگاسینین ۲-جی گروپ مرحله‌سین اویونلاری چرچیوه‌سینده قطرین "الوکره" کلوبو ایله اولوب.

دوبایین "راشد" استادیونون‌دا کئچیریلن قارشیلاشما ۳-۳ حسابی ایله باشا چاتسا دا، "تراکتور" کلوبو ۴ اویوندان ۱۰ خال قازاندیغینا گؤره،
نوبتی مرحله‌یه یوکسلیب.