سون بیر نئچه آیلار ایراندا دلارین مزه‌ننه‌سی بئش قات قالخدی، اما اوکتیابردا یئنیدن اوجوزلاشما اولدو. بیر نئچه گوندور کی، یئنیدن باهالاشما باشلاییب. ایرانا قارشی ۲-جی مرحله سانکسییالارین باشلاماسی سببیندن دلارین باهالاشماسی موشاهیده ائدیلیر. یعنی سانکسییا اؤنجه‌سی دلار پسیخولوژی تأثیرینی یارادیب.

آخار. آذ خبر وئریر کی، بو سؤزلری ایرانین آذربایجان‌داکی کئچمیش سفیری، تانینمیش دیپلومات افشار سلیمانی Teleqraf.com-آ گنیش موصاحیبه‌سینده دئییب.

دیپلومات قید ائدیب کی، بوتون بونلارا باخمایاراق، سانکسییانین تأثیری دوشونولدویو کیمی دهشتلی اولمایاجاق.
«حساب ائدیرم کی، دوالواسییا پروسسی، قیمتلرین باهالاشماسی یالنیز سانکسییالار و ترامپین بیاناتلارینین تأثیریندن دوغماییب. البته، سانکسییانین تأثیر وار، اما ایران دؤولتینین اؤزو ده اولجه‌دن پروقنوز آپارمالی، اؤلکه‌یه داخیل اولان دلارین تنظیمله‌نمه‌سینی حیاتا کئچیرملی ایدی. منجه، بو ایستیقامتلرده معین نقصانلار اولوب».

سولیمانی بیلدیریب کی، ایران آمریکادا یئنی حاکمیته قدر دؤزمه‌یه مجبوردور:

«منجه، ایندی ایران کنگرسه کئچیریلجک آرالیق سئچکیلری گؤزلییر. سئچکیلرده دموکراتلار غالیب گلسه، مومکوندور کی، بونون ترامپین سیاستینه معین تأثیرلری اولسون، پرزیدنتی محدودلاشدیرسینلار. ایندیکی وضعیته ایکی ایل دؤزولسه، نؤوبتی سئچکیلرده احتیمال کی، ترامپ غلبه چالمایاجاق. آنجاق بونلارین هامی‌سی احتیماللاردیر. یعنی بونلار باش وئررسه، ایرانین وضعیتدن چیخماسی اوچون فورصت یارانا بیلر. عکس تقدیرده داها چتین دؤور باشلایار».
دیپلمات بو جور تضییقلره رغما، ایران‌دا حاکمیت دییشیکلیگی احتیمالینی استثنا ائدیب:

«ایران‌دا حاکمیت دییشیکلیینی گؤرموره‌م. ایرانین اؤز داخیلینده طبیعی کی، هر زامان اصلاحاتچیلار اولوب، ایسته‌ییبلر کی، اؤلکه‌نین پروبلملری حل ائدیلسین، نورمال خاریجی سیاست قورولسون، داخیلده سربستلیک و آزادلیق اولسون. نظره آلماق لازیمدیر کی، ۲۰-۲۵ ایلدیر کی، اصلاحاتچیلار دئییلن قوه بونو ایستییر. دوشونورلر کی، خاریجی سیاستده، داخیلده معین دییشیکلیک ائتمک لازیمدیر کی، ایران ایسلام رسپوبلیکاسینین سیستمی بیر قدر محکه‌ملنسین، عینی زاماندا اؤلکه اینکیشاف ائتسین، خالقین دا ریفاهی تعمین اولونسون. بو مقصدله اصلاحاتچیلار چالیشیبلار. پارلامنتده نماینده‌لری اولوب، پرزیدنت سئچکیلرینده ایشتیراک ائدیبلر. البته، اونلارین قارشی‌سیندا مانعه‌لر ده یارادیبلار و س. اما هر حالدا حسن روحانی کیمی سیاستچی اصلاحاتچیلار طرفیندن دستکلنیب. فیکریمجه، اصلاحاتچی قوه‌لر اؤلکه‌نی بو دورومدان چیخارسالار، حاکمیتین دئوریلمه‌سی کیمی فیکیرلره ده یئر اولماز. اینسانلار آراسیندا ناراضی‌لیق وار، اما بو داها چوخ اقتصادی مسئله‌لرله باغلیدیر. یعنی خالقین حاکمیتین قارشی‌سیندا دورماسی کیمی منظره یوخدور. بیر سؤزله، موختلیف یوللار و واریانتلار وار. اما سانکسییالار واسطه‌سیله حاکمیتی دییشمک، سیستمی ییخماق مومکون دئییل».

سلیمانی وورغولاییب کی، روسییا-ایران امکداشلیغی اولسا دا، بو، ایستراتژی متفیق‌لیک سوییه‌سینده دئییل:

«ساده‌جه اولاراق، بعضی مسئله‌لرده روسییا و ایرانین ماراقلاری اوست-اوسته دوشدویو اوچون امکداشلیق اولوب. مثلاً، سورییا پروبلمی. سورییا پروبلمی حل اولونانا قدر بو امکداشلیق داوام ائد‌جک. چونکی سورییادا روسییانین قارشی‌سیندا آمریکا وار. بو سبب‌دن ده ایران روسییایا لازیمدیر. ائله روسییا دا ایرانا لازیمدیر».

دیپلمات ایرانا آمریکا طرفیندن حربی موداخیله اولاجاغی تقدیرده تهرانا هئچ بیر اؤلکه‌نین دستک وئرمیجیینی بیلدیریب:

«آمریکا طرفیندن ایرانا حربی موداخیله اولارسا، نینکی روسییا، هئچ بیر اؤلکه ایرانین یانیندا اولمایاجاق. بو، آیدین مسئله‌دیر. البته، ایرانا حربی موداخیله احتیمالی یوخدور. آمریکا رسمیلری ده ایرانا حربی موداخیله‌نین طرفداری دئییللر. ساده‌جه بعضا دئییلیر کی، ترامپ داخیلی مسئله‌لرده پروبلم یاشایارسا، سئچکی عرفه‌سین‌ده اودوزدوغونو گؤرسه، مومکوندور کی، موداخیله حاقیندا دوشونولسون.

آنجاق من بونو رئال حساب ائتمیرم. دوزدور، آمریکا گوجلودور، اما ایران دا ضعیف دئییل. هم ده آمریکا افغانیستان‌دا، عراق‌دا، یمن‌ده، سورییادا اوزون ایللردیر کی، اذیت چکیر، چتینلیکله قارشیلاشیب. یعنی ایرانا هوجوم ائتمک مسئله‌سی گونده‌مه گله بیلمز. سانکسییالارلا، سیاسی محدودیتلرله، تضییقلرله ایرانی ایستدیی یولا گتیرمه‌یه چالیشیر. حربی قارشی‌دورما احتیمالی یا عمومیتله یوخدور، یا دا چوخ آزدیر».