آمریکا مهاجرت‌ده یاشایان آذربایجان اصیل‌لی تانینمیش موغه‌ننی گوگوش (فائقه آتشی) صنعتله ویداع‌لاشیر.

Kult.az خبر وئریر کی، او، "آسوشیتد پرس"ه "گناها باتمیش سس" آدلی کیتابی حاق‌دا مصاحبه‌سین‌ده دئییب.

"بلکه اسلام رسپوبلیکاسی دئوریلدیکدن سونرا یئنی‌دن باشلایا بیلره‌م"،- موغه‌ننی بیلدیریب.

ایران‌دا آغیر شرایطین حاکم اولدوغونو و انسانلارین یاشاییشلارینین چتینلشدیینی سؤیله‌یه‌ن گوگوش وطنداشلاری حقوقلاری اوغروندا مبارزه‌یه و بو آغریلارا سون وئرمه‌یه چاغیریب:

"ایران‌لی گنجلر و قادینلار سربست گئییم حقوقو، سؤز و بدیعی افاده آزادلیغی و نرمال حیات دا داخل اولماقلا ان اساس حقوقلاری اوغروندا مبارزه آپاریرلار. ایران خالقی تمیز سو، تمیز هوا و یاشایا بیله‌جکلری تورپاق اوغروندا مبارزه آپاریر. گنجلریمیز گنجلیکلریندن هئچ واخت زوق آلمادان قوجالیبلار. خالق بونا سون قویمالیدیر!"،- او دئییب.

آذربایجان‌لی موغننی اسلام رسپوبلیکاسینین حاکم اولدوغو واختدان بو گونه کیمی ایرانلیلارین هئچ نیی پلانلاشدیرا بیلمدیکلرینی و تالعلرینین تصادفلرله معینلشدیریلدیینی بیلدیریب:

"۴۷ ایلدیر کی، حیاتیمیزی اداره ائده بیلمیریک. پلانلاشدیردیغیمیز هئچ نه باش وئرمه‌دی و باش وئرن هر شئی پلانلاشدیریلمامیش تصادفلر ایدی. منیم ده حیاتیم استثنا دئییل".

خاطرلاداق کی، فائقه آتشین (گوگوش) ۱۹۵۰-جی ایل مایین ۵-ده تهران‌دا سرچشمه رایونون‌دا آنادان اولوب. او، ۱۹۴۵–۱۹۴۶-جی ایللرده موجود اولموش باش ناظر سید جعفر پیشه‌ورینین رهبرلیک ائتدیی ملی حکومتین فدایی اوردوسونون پولکوونیکی، اصلن گنجه شهریندن اولان قولو صبحی‌نین نوه‌سی‌دیر. اونون والیدینلری باکی‌دان تهرانا کؤچوبلر.

او، آذربایجان، فارس، اینگیلیس، فرانسیز، اسپان، ایتالیان و ارمنی دیللرینده ماهنیلار اوخویوب. گوگوش ایران‌دا معاصرلیک، دب و مدنی ترقی رمزی اولوب. ۱۹۷۹-جو ایل انقلابین‌دان سونرا اونون فعالیتینه قاداغا قویولوب. ۲۰۰۰-جی ایلده شمالی آمریکایا کؤچوب.