روبرت حسین و یاخود روبر اوسین…
اونو بوتون دنیا سئویردی.

کولت.آذ خبر «دونیاجا مشهور اولان، اما آذربایجان‌لی اولدوغونو آز آدامین بیلدیی، چوخوموزون ایسه هئچ بیلمدیی شخصیتلر حاق‌دا معلوماتلاری تقدیم ائدیلیر.

حاقین‌دا اینترنت واسطه‌سیله معلومات الده ائتدییمیز شخص فران‌سادا یاشاییر، دونیا کینوسونون ان مشهور سیمالارین‌دان بیری‌دیر. آذربایجان کؤکنلی روبئر اوسین‌دن دانیشیریق.

روبر اوسین آذربایجان اصیل‌لی فرانسیز آکتیور و رژیسوردور.

اوسین ۱۹۲۷-جی ایلده پاریس‌ده موسیقی‌چی عائله‌سین‌ده دوغولوب، آتاسی امینوللا حسینوو (آندره اوسین) سمرقند آذربایجانلیلارینداندیر، ۱۹۱۷-جی بولشویک انقلابین‌دان سونرا آوروپایا مهاجرت ائدیب، سکریپکاچی و بسته‌کار اولوب. آناسی آنا مارکوونا مینکووسکا روسیالی آکتریسا ایدی.

روبر اوسین ایلک ائولیلیینی ۱۹۵۵-جی ایلده مارینا ولادی، ایکینجینی ۱۹۶۴-جو ایلده ۳۴ یاشین‌دا فرانسوازا ژیرونون قیزی کارولین الیاسفله، اوچونجونو ایسه کاندیز پاتو ایله یاشاییب. ۱۹۷۳-جو ایلده‌ن بری مشهور فرانسیز آکتریسا پاسکال ریوو ایله ائولیدیر.

روبر اوسین صنعت دنیاسین‌دا پاریس‌ده فعالیت گؤستره‌ن «قران قینقول» تئاترین‌دان آتیلیر. کینو اکرانلارین‌دا ایلک دئبوتو ر. کادناکین ۱۹۵۴-جو ایلده ماوی اکرانلارا چیخان «ساریشینلارین ساحلی» ایله باش توتور. ۱۹۵۵-جی ایلده ایسه ایلک فیلمی «فیریلداقچیلار جهنمه گئدیر»ی چکیر. فیلمین چکیلیشیندن بیر ایل سونرا ائولنجیی مارینا ولادییه بو اکران اثرینده رول وئریر. مارینا ولادی اوسینین سونراکی فیلملرینده ده رول آلاجاق: «گناهلاریمیزی باغیشلا» (۱۹۵۶)، «سن زهرلیسن» (۱۹۵۸)، «جاسوسون گئجه‌لری» (۱۹۵۹).

۱۹۵۶-جی ایلده چکدیی فیلم اونون رژیسورلوق فعالیتینین ایلک جهدلریندن بیری ایدی. همین ایل لامپنین دوستویئوسکینین «جنایت و جزا» رومانی اساسیندا عرصه‌یه گتیردیی فیلمده («فران‌سیز راسکولنیکوو») رول آلیر.

او، فرانسیز آکتیورو روجر وادیمله دوست ایدی. وادیم دؤورون مشهور آکتریساسی بریجیت باردونون حیات یولداشییدی. همین ایللرده «کیم بیلیر» (۱۹۵۷) و «دون ژوان ۷۳» فیلملرینده رول آلیر. هابئله «بیر قاتیلین اؤلومو» (۱۹۶۳)، «گؤزلر آلتینداکی دایره‌لر» (۱۹۶۴)، «دوسلدورفلو وامپیر»، «ایپ و کولت»، «دوشمه نقطه‌سی» (۱۹۷۰) آدلی اکران اثرلرینده. ۱۹۶۷-جی ایلده ایسه «راسپوتینی من اؤلدوردوم» فیلمینی چکیر.

۱۹۸۲-جی ایلده ویکتور هوقونون اثرلرینین موتیولری اساسین‌دا یئنی اکران ایشینی اثرینی عرصه‌یه گتیره‌رک، بورادا اوچونجو حیات یولداشی کئندیس پاتونا اپونینا رولونو وئریر. پاتونا اوسینین ۱۹۸۵-جی ایلده اکرانلارا چیخان «قیرمیزی کورو» فیلمین‌ده ده رول آلمیشدی.

روبر اوسین کاریراسی عرضین‌ده ۸۰-دن چوخ فیلم‌ده رول آلیب، اونلاردان بعضیلرینین رئژیسسورو اؤزودور. ۱۹۷۰-۸۰-جی ایللرده فرانسا و دنیا کینوسونون ان پارلاق «اولدوزلارین‌دان» بیری اولماسینا باخمایاراق، روبئر اوسین همیشه تئاترچی ایدی. تصادفی دئییل کی، ۱۹۷۰-۱۹۷۹-جو ایللرده ریمسده‌کی میللی خالق تئاترینا رهبرلیک ائتمیشدی. همین ایللرده «دانتون و روبسپیر»، «عیسی آدلی بیر آدام»، «نوتر دام کاتدرالی» و «آنژلیکا» کیمی اثرلری صحنه‌لشدیرمیشدی. ژان-پول بئلموندو اوچون ایسه «کینا»نی صحنه‌یه چیخاردی. هابئله سارتر اوچون «سیرانو دئ برژراکا»نی…

باکی‌یا اوچ دفعه سفر ائد‌ن روبر اوسین سونونجو دفعه اؤلکه‌میزده ۲۰۱۵-جی ایلده اولوب. همین ایل آذربایجان‌دا کئچیریله‌ن ۱-جی آوروپا اویونلارینین مشعل‌دارلاریندان بیری ایدی.

باکی‌دا اولارکن ژورنالیستلر قارشی‌سینا کئچن مشهور آکتیور اؤز آتا وطنی حاق‌دا خوش سؤزلر دئدی:

«آذربایجان دینلره، باشقا خالقلارا اولان مناسیبته گؤره قلبیم‌ده فرح حسی اویاتدی. دوشونوره‌م کی، بو مناسبت دنیانین هئچ بیر یئرینده یوخ‌دور. فخر ائدیره‌م کی، بو ملتین بیر حیصه‌سییه‌م».

روبر اوسین آوراسیا آکادمیاسینین عضوودور.