آذربایجانین گنجه شهرین‌ده توریستلر اوچون ماراق‌لی اولان بیر یئر هامینین دقتینی چکه‌ن «شوشه ائو»دیر. ایکی مرتبه‌لی یاشاییش ائوی شوشه بوتولکالاردان اینشا اولونوب. بو تیکیلینی شهر ساکینلری قوناقلارا فخرله گؤستره‌رک حاقین‌دا معلومات وئریرلر. «شوشه ائو»ی امک و محاربه وتئرانی اولان ایبراهیم جفروو تیکیب. بؤیوک وطن محاربه‌سین‌دن قاییتمایان قارداشینین، بلکه نه واختسا تیکدیی بو ائوین سوراغینی آلاراق گلجیینی دوشونور. ۱۹۶۶-۶۷-جی ایللرده تیکدیی ائوه ایسه او واختکی کیرووآباد یوخ، اونوتدورولماغا چالیشیلان گنجه آدینی حک ائدیب دیوارلارا. و همین زامان‌دان بری گنجه آدینی دونیانین بیر چوخ یئرلرین‌دن گلن توریستلره تانیتماغا نایل اولوب.

گنجه شهرین‌ده آدی دیللره داستان اولان بو ائوی مشهور ائد‌ن اونون تیکینتی ماترئاللاری اوزینه بوتولکادان ایستیفاده ائدیلمه‌سی‌دیر. "بوتولکا ائو" آدی ایله شهرده تانینان تیکیلی، حاضردا حاق دونیاسین‌دا اولان ایبراهیم جفروو آدلی گنجه ساکینینین ایدئیاسینین محصولودور. او بو ائوین تیکینتی‌سینده، شامپان بوتیلکاسین‌دان توتموش، کیچیک درمان شوشه‌لری ده داخیل اولماقلا، ۴۸ مین بوتیلکادان ایستیفاده ائدیب.

حتی بینانین اوزونه ناخیش وورماق اوچون سوچی‌دن چئمودانلارلا خیردا دنیز داشلاری دا داشیییب.

ائوین تیکینتی‌سینده مقصد ایسه "تیکدیم کی، ایزیم قالا" دئییل، "تیکدیم کی، قارداشیم گله" آرزوسو اولوب. بیرگه جبهه‌یه یوللاندیغی، لاکین ایتکین دوشدویو خبری گلن یوسیف آدلی قارداشینین، نه واخت‌سا دوغما شهرین‌ده قارداشینین اونون شرفینه تیکدیی بو ائوین صداسینی ائشیدیب گئری دؤنجیی اومیدی ایله باشلاییب ایشه.

ائوین بوتون ناخیشلارینی و موزایکالارینی اؤز الی ایله یارادیب. ائوین اؤن حیصه‌سینه رسام دوستو طرفین‌دن قارداشی یوسیفین و اؤزونون شکیللرینی چکدیریب. همچینین بوردا ائوین تیکیلیب باشا چاتما تاریخی اولاراق ۱۹۶۷-جی ایل یازیسی حک اولونوب.