بو ایل محمد حسین بهجت تبریزینین (شهریار) آنیم مراسیمی بئش گون مدتینه شاعرین آنادان اولدوغو خشگناب کندی و تبریزده کئچیریله‌جک.

Kult.az خبر وئریر کی، بو حاق‌دا شرقی آذربایجان مدنیت و اسلام ارشادی تشکیلاتینین باشچیسی نعمت‌الله پایان معلومات وئریب.

"بو ایل استاد شهریارین خاطره‌سینی یاد ائتمک پروگراملارینی یالنیز رسمی مراسیمله محدودلاشدیرمایاراق، فرقلی و مختلیف فورمالاردا کئچیرمه‌یه چالیشیریق"،- او بیلدیریب.

پایان علاوه ائدیب کی، آنیم مراسیملری ایله یاناشی، بو پروگراملار چرچیوه‌سینده استاد شهریارین شخصیتینین و ادبی ارثینین مختلیف آسپکتلرینین تحلیلی اوچون ادبی گؤروشلر، مدنی پروگراملار و بدیعی سمینارلار دا تشکیل اولوناجاق.

"شهریارین خاطره‌سینی یاد ائتمک آذربایجان دیلینی، ادبیاتینی، اینجه‌صنعتینی و مدنی کیملیینی قوروماق اوچون بیر فرصت‌دیر و امید ائدیریک کی، بو ایلکی پروگرام بوگونکو نسل ایله استاد شهریارین ابدی ارثی آراسیندا داها بؤیوک علاقه یاراداجاق"،- مدنیت و اسلام ارشادی تشکیلاتینین باشچیسی وورغولاییب.

قید ائدک کی، ۲ یانوار ۱۹۰۶ ایلده آنادان اولان شهریار ۱۸ سنتیابر ۱۹۸۸-جی ایلده تهران‌دا دنیاسینی دییشیب و ۲۰ سئتیابردا تبریزده مقبره‌الشعرا (شاعرلر مقبره‌سی) کومپلئک‌سینده تورپاغا تاپشیریلیب.