گئیمیسن آل آرازباری

خان چوبانین نازلی یاری
نئجه یاتیم سنن آیری
سال یانیندا دوُشک منه...

گئجه-گوندوز، دایانمادان، اوسانمادان ایدئولوژیک بیلگی‌لری کوتله‌نین دوشونجه و بیلینجینه یئرلشدیرمک هیپنوپئدییا آدلاندیریلیر. بو ایدئولوژیک بیلگی و رئکلام‌لار، یاتاغیندا اوزانیب اوغوز یوخوسونون دادینی چیخارماقدان توت "آرازباری" مئشه‌لییی بویونجا آددیملایارکن "ارسباران" آدینی بیلینج‌سیز بیر شکیلده دیله گتیرینجه سورَر.

بیر اوجو اوتایین بیلَقان و خودافرین-ینده بیر اوجو ایسه شانلی موغانین اولتان قالاسیندان تاریخی دیزمارا قدر گئنیش بیر جوغرافییادا یاییلان "آرازباری" اورمانینا بوتون اکتیویست‌لرین "جنگل های ارسباران" دئمه سی بؤیوک دوشونر لویی آلتوسر دئمیشکن دؤولتین ایدئولوژیک دزگاهی اولان "مئدییا و رئکلامین" کیملیک ساواشیندا بولونانلارین تاریخی و دیل بیلینجینی دییشدیرمکده اوغور قازانماسی‌نین ایلکین قیغیلجیملاریندان بیری کیمی گوُزه چارپماقدادیر.

"آرازباری" آدی سید سوشینسکی‌نین سسینده سئویلن "آرازباری" خالق ماهنیسی، دوغاری(شرق) اوُلکه‌لرینین اوُلمز بسته‌کاری اولان اوزئییر حاجی‌بَی‌اوفون "آرازباری" بسته‌سینده منگولشدی (ابدی لشدی). بونو نئجه اونوتماق اولار؟

بیر چوخ بایاتی، گرایلی، ماهنی و دئییمیده اوُز یئرینی توتموش "آرازباری" سوُزو ندن "جنگل های ارسباران" کیمی مئدییا اکتیویست‌لرینین آغزیندان یئره دوشمور؟ آخی بیزیم شیفاهی ادبیاتیمیزدا "جنگل های ارسباران" دئییل ده "آرازباری" کئچیب. بونو نئجه اونوتماق اولار؟

خان چوبانام آرازباردان
باغچالاریم دولدو باردان
ایگید قالسا گر قاطاردان
تای-توشونا چاتا بیلمز...

بایاتی نین زیلینن
دئ، دانیش خوش گونونن
یاردان بیر خونچا گلدی
آرازبارین گولونن...

بیز آرازا "ارس"، ساوالانا "سبلان" و قوشاجایا "میاندوآب" دئمه دیییمیز کیمی "آرازباری" آدی یئرینه ده "ارسباران" آدینی دیلیمیزه آلمامالی‌ییق. چونکو تورکجه ده اولان توپونیم‌لرین آدی بیزیم بو جوغرافییایا اولان حاکیمییتیمیزی و یئرلی لیییمیزی، بورالارا گلمه اولمادیغیمیزی گوُسترمکده‌دیر.