دویو و سوغانین ادویاتلا لذتله‌ن‌دیریله‌رک اوزوم یارپاغینا بوکولمه‌سی ایله حاضرلانان بو یئمه‌یه اورتا شرق و شرقی آرالیق دنیزی تورپاقلارین‌دا، دئمک اولار کی، هر اؤلکه‌ده راست گلینیر. هر خالقین آغیز دادینا گؤره خیردا فرقلری اولسا دا، بیر آز آدلاری دییش‌سه ده، یئمک ائله عینی یئمک‌دیر.

تورکییه‌ده اساساً چرز و یا تاماملاییجی یئمک اولاراق حاضرلانیر "زئیتینیاغ‌لی یاپراک سارما"سی. هم یئمک، هم چای سوفره‌لرینه گتیریلیر. هر هان‌سی بیر حیوان اتین‌دن ایستیفاده ائدیلمه‌دن بیشیریلدیی اوچون وئگئتئریانلار اوچون ده سون درجه اویغون بیر یئمک‌دیر.

"زئیتینیاغ‌لی یاپراک سارما"سی، یعنی زئیتون یاغ‌لی دولما اوچون نلر لازیم‌دیر، اولجه اونلاری سادالایاق:

۳۰۰ قرام دوزلو اوزوم یارپاغی،
۱ ادد لیمون،
۴ یئمک قاشیغی زئیتون یاغی،
۱ ایستکان قاینار سو
دولمانین ایچی اوچون‌سه بونلار لازیم‌دیر:

یاریم (۱/۲) ایستکان زئیتون یاغی،
۳ ادد اورتا بوی‌لو سوغان،
۱ ایستکان یاریم دویو،
۱ ایستکان قاینار سو،
۱ یئمک قاشیغی شام فیستیغی،
۱ یئمک قاشیغی کیشمیش (کوش اوزومو)،
۱ چای قاشیغی دوز،
۱ چای قاشیغی ایستیوت،
۱ چای قاشیغی نانه،
۱ چای قاشیغی یامایکا ایستیوتو و یا قارا دنه ایستیوت (یئنی‌باهار)،
یاریم چای قاشیغی دارچین.
زامان گل‌دی زئیتون یاغ‌لی دولمانی هازیرلاماغا.

اولجه اوزوم یارپاقلارینی دوزونون گئتمه‌سی اوچون ایستی سو دولو درین بیر قاب‌دا ۵ دقیقه ساخلایین. سونرا اونلاری سودان چیخاریب سویوق سودا یاخالایین، سوزون.

بو آرادا دولمانین ایچینی هازیرلایین. سوغانی خیردا-خیردا دوغرایین. یاریم ایستکان زئیتون یاغینی بیر قازانا تؤکه‌رک سوغان و شام پوسته‌نی بیرلیک‌ده قووورون. دویونو یویون. سوغان پؤرتدوک‌دن سونرا دویونو علاوه ائدیب قووورمایا داوام ائدین. داها سونرا نؤوبه ایله کیشمیش (قوش اوزومو)، نانه، دوز و ایستیوتو علاوه ائدیب یاخشیجا قاریش‌دیرین. بیر ایستکان ایستی سو علاوه ائد‌رک دویو یومشالانادک بیشیرین. بیشه‌ن دویونون ایلیق اولماسینی گؤزلیین، سونرا ایچینه دارچین و یامایکا ایستیوتو (قارا دنه ایستیوت، یئنی‌باهار) علاوه ائدیب قاریش‌دیرین و ایلیقلاشمایا قویون.

سیرا گل‌دی یارپاقلاری دولدورماغا. یارپاغی گؤتوروب دوز و اورتاسین‌دان دامارلی اولان حیسه‌سی اوستونه گله‌جک شکیل‌ده دوز زمینه سرین. زده‌له‌مه‌دن کسکین بیر بیچاقلا آز قیسمینی کسین. قاریشیق‌دان بیر چای قاشیغی قدر گؤتوروب اورتا حیسه‌سینه قویون. یارپاغین کناردا قالان حیسه‌لرینی اورتایا باغلاییب اونو رولون شکلین‌ده سارین. عینی پروسئ‌سی بوتون یارپاقلارا تطبیق ائدین.

ایندی قازانین دیبینه بیر نئچه اوزوم یارپاغی دوزون، هازیرلادیغینیز دولمالاری یان-یانا قویون. لیمونو هالقا-هالقا دیلیمله‌ییب سارمالارین اوزرینه یئرلش‌دیرین. بیشیررکه‌ن آچیلماسین دئیه اوزرینه بیر نیمچه قویون. بیر ایستکان یاریم قاینار سو و ۲ خؤرک قاشیغی زئیتون یاغینی دا قازانا علاوه ائتدیک‌دن سونرا قاپاغینی اؤرتون، دولمالاری ضعیف اوددا تخمیناً ۳۵ دقیقه بیشیرین. ایسته‌یه گؤره ایلیق و یا سویوق حال‌دا سوفره‌یه گتیره بیلرسینیز. نوش اولسون.