آنا صحیفه کولت |
کولت. آذ آذربایجانین گؤرکهملی یازیچیسی فرمان کریمزادنین " تبریز ناموسو" آدلی تاریخی رومانینی تقدیم ائدیر:
کؤچورن آینوره مممدووا
من گویلرله دانیشدیم. تانریلار سنین قوربان گئتمه یینی ایستمیر! تانریلار دئییرلر کی، هر گئدن اوزو الیله بیر نفر آپارسا، دونیا بوشالار، آنالار آزالار، ایگید اوغول، مرد قیز دوغان قیزلار گئتسه، اونلاری کیم دوغاجاق؟ کیم؟
آلان- قوا اونون سوزونو یاریمچیق کسدی:
من بوندان سونرا ار ائوینه گئده سی، اوغلان دوغاسی دئییلم، شامان بابا. قوی سونسوز بیر قیزینی، قسیر قبول ائتسین.
بو دفعه ده شامان اوجاغا نه سه آتدی و اوردان حیرصلی، آغ بیر آلوو پوسکوردو
یوخ، گویلر، تانریلار سنین دئدیکلریندن حرصلنیر. اونلارا اطاعت ائتمک بورجوندور.
گلین قالخدی.
اطاعت بورجومدور،- دئدی. نوبه م چاتاندا ار ایگیدیمین یانینا گئتمه یی صبیرسیزلیکله گوزله ییرم.
خانیم قیزیم! کورپه لرینی آتالاری کیمی ایگید بویوتمه یی سنه حواله ائتسم ده، اونلاری قارا، چووغونا، غووغایا، چتینلی یه، آجلیغا اویرت.
اوزگه فیکریم ده یوخدور، ائی اولولار اولوسو!
بو سوزلری آلاچیغین آرخاسیندان قولاق آسان یئکه نیدون ائشیدیر و ایچی حیرصدن قوورولوردو. شامانلا اولجه دانیشمیش، اما اونو دئدییینه راضی سالا بیلمه میشدی. آلان-قوادان سونرا او، قارداشی اوشاقلارینی دا آرادان گوتورمه یه، او دونیایا اوتورمه یه قطعی سوز وئرمیشدی. ایندی فیکیرلشدیکلری تامام آلت-اوست اولموشدو.
بلی، او واخت بئله اولموشدو. بس ایندی؟
آخی رویادا هر شئی حیاتدا اولدوغو کیمی باش وئرمیشدی! بوتون وجودو، وارلیغی، احتراصی حرکته گلمیشدییی. گوزونو آچاندا ایش-ایشدن کئچمیشدی. اما او هئچ بیر کیشینین ایزینی- توزونو آلاچیقدا گورمه میشدی. حیات کیمی شیرین آنلار اولوم کیمی زهره دونموشدوو. قالخیب قارانلیقدا چاخماق- قووو تاپدی. چاخماغی چاخیب، قیغیلجیملا بیر تیکه پامبیغی آلیشدیردی. چیندن گتیریلمیش اود قیمتلی بو پامبیق عوضی ایدی، سونرا یاشیل بیر آلوولا یاندی، ایچری یه ضعیف ایشیق دوشدو. اما اوندان، بالالاریندان باشقا آلاچیقدا یئنه هئچ کسی گورمه دی. هئچ کس یوخ ایدی و آلاچیغین آغزینداکی پالاز آخشامدان نئجه کوزننمیشدیسه، ائله جه ده دوروردو.
داوامی وار
تاریخ
2020.01.29 / 10:17
|
مولف
فرمان کریمزاده
|