«مالی، پولو چوخ اولان، وارلی» آنلاملارینی قارشیلایاجاق، ۱۹۶۰لاردا تورکیه جمهوریتینده یارانمیش بیر سؤزجوکدور.

"سنین قیزین، ماشاللاه، داها اون‌ دؤردونه باسار باسماز بو گئده‌نین ان وارسیل آدامینین قاشیغینا چیخدی." ( فاکیر بایکورت ۱۹۷۰)
سؤزجویون یاپیسینا باخینجا « یوخسول» سؤزجویونون یاپیسی‌نی گؤز اؤنونه آلاراق، آنلامجا بو سؤزجویون قارشیتی اولاراق تؤره‌دیلمیشدی:

یوخسول: یوخ + سول

وارسیل : وار + سیل

دیلیمیزده بو قاورامی، بیراز داها گئنیش، فارسجادان آلینمیش، «سنگین» سوزجویو قارشیلاییر!
«سنگین» سؤزجویو دیلمیزه کئچرکن «س> ز» سس دییشیمی اولایی یاشامیش، فارسجاداکی آنلامیندان(آغیر) داها فرقلی و داها اوزاق آنلام قازانمیشدی.

سنگین > زنگین(پوللو ، ماللی، وارلیقلی، وئریملی ، یارارلی، ....)

سؤزجویو فارسجادا قیساجا یاپیمسال و آنلامسال اینجه‌له‌یینجه بو سؤزجویون دیلیمزده قوندارما اولدوغونو و دیلیمیزه یاراشمایان بیر یاماق اولدوغونو گؤروروک:

سنگین: سنگ + ین

( داشدان یاپیلمیش، داشلی نسنه، داش کیمی و ....)

تورکجه‌ده‌کی آنلامینی دوشونرکن قیمتلی داشلارلا سوسلنمیش بیر گئییم یا باشقا بنزر بیر نسنه‌نی دوشونوب و اوزرینده‌کی داشلاردان دولایی دیرلی اولماسینی( زرین سؤزجویو کیمی) اوردان دا، او نسنه‌نی ییییه‌له‌نه‌نین ماللی، وارلی اولماسی کیمی بیر منطق یاراتمالییق.