آنا صحیفه کولت |
قایناق: ملائکه نظری
سحر گئدیردیلر اونلاری چاغیرالار قاینالتییا، گؤردولر هله سس گلیر. گوله-گوله دئدیلر:
-هله اویناشیرلار!
بیر- ایکی ساعات سونرا گئتدیلر. گئنه او سس گلیردی. قاییتدیلار. ناهار اولدو گئتدیلر، ، گئنه او سس گلیردی. قاپینی چالیب، اونلاری سسلهدیلر، بیر سس گلمهدی. ائله سحرکی سس گلیردی.
قاپینی سیندیریب، ایچری گیریب گؤردولر نه اویناشماسی؟! خالانین قیزی باشی کسیک ییخیلیب، قان اوتاغی بورویوب. بیر تشتده ایکی اؤر دک اؤتوروبلر، اونلارین سسی ایمیش! آغلایا-آغلایا قاچدیلار داللاریجاق، گؤردولر اوزاقدا ایکی نفر گئدیر. توولو یئریدیلر یئتیشنده گؤردولر بیر قوجا کیشی اوتوروب بوستان گودور. «امیر یئمن دوعا اوخویوب قیزی بیر بوستان، اؤزونو قوجا شکلینه سالمیشدی»
سوروشدولار: -آی قوجا کیشی! بوردان گؤرمهدین ایکی نفر سوووشا؟
قوجا دئدی: -یوخ. بویورون بوستاندان هر نه کؤنلوز ایستهییر درین، یئیین.
-آی قوجا کیشی او قدر فیکیر خیالیمیز وارکی، بوغازیمیزدان سو دا آشاغی گئتمز هاردا قالمیشدی بوستان یئمهیی!
بئله دئییب قاییتدیلار.
بیردن چؤنوب دالا باخدیلار، گؤردولر گئنه ایکی نفر گئدیر. قاچدیلار، گؤردولر آدام یوخ، بیر کؤتوک وار، بیر سئرچه باشیندا فیرلانیر. بیلدیلر اونلاردیلار، داش آتیردیلار سئرچهیه، آغاجا، باشی کسیلن قیزین آناسی کؤتویو دیشلهییردی، امیر یئمنین آناسی، باجیسینی دیله توتوب، مایوس حالدا قاییتدیلار. باشی کسیلمیش قیزی قویلاییب اونا یاس توتدولار.
امیر یئمن قیز ایله گئتدیلر بیر کندده یاشاییش باشلادیلار. خوشلوقدا یاشاییردیلار. بیر گون امیر یئمن دئدی:
-گؤزلیم! منیم پالتارلاریمی یویاندان سونرا اود اوسته قوروتما ها!
-نییه؟!
-چون اوندا چیخیب گئدرم! اؤز الیمده ده دییل!
دئدی: یاخشی
گونلر بئله کئچیردی، اینسان هر ایش دن قورخسا باشینا گلر. بیر گون قیزین یادیندان چیخمیشدی، پالتاری اود اوسته قورودوردو، امیر یئمن بیر قوش اولدو گئتدی! وای! ایکی الی اولدو بیر تپهسی! آغلادی، سیزلادی خبر اولمادی، امیر یئمن قاییتمادی. قیز گئدیب اوتوراردی یوللار آغزیندا هامیدان امیر یئمنی خبرلشردی.
بیر گون قیزلار بولاغا گئدیردیلر، دئدی:
-پوروش آفتافا گؤتورن قیز. پوروش قلعهدن چیخان قیز. امیر یئمنی گؤرمهدین؟! منیم یاریمی گؤرمه-دین؟!
دئدی: یوخ
اوبیری قیز گلدی:
-گوموش آفتافا گؤتورن قیز. گوموش قلعهدن چیخان قیز. امیر یئمنی گؤرمهدین؟! منیم یاریمی گؤرمهدین؟!
دئدی: یوخ
بیر آیریسی گلدی، بیر ایفادهلیسی!
-قیزیل آفتافا گؤتورن قیز. قیزیل قلعه،دن چیخان قیز. امیر یئمنی گؤرمهدین؟! منیم یاریمی گؤرمهدین؟!
قیز حیرص ایله دئدی:
امیر یئمن منیم یاریمدی! سنین یارین دییل. ایندی ده گلمیشم سو آپارام یاریم ال-اوزونو یویا.
دئدی:
-یاخشی، وئر آفتافانی من دولدوروم.
وئرمیردی، یالواریب آلدی. دولدورا-دولدورا یاواشجا اوزویو سالدی ایچینه! وئردی قیز آپاردی. قیز سویو تؤکوردو امیر یئمن اللرینی یویا، اوزوک دوشدو الینه. واااااای! هرزاد یادینا دوشوب، او قیزا دئدی:
-منیم یولومو گؤزلهین وار، گرک گئدم. گلدی سئوگیلیسینین یانینا، باسیب باغرینا اوزوندن اؤپوب، دئدی:
-منی باغیشلا سئوگیلیم. بیر ده سنی یالقیز بیراخمارام.
داها خوشلوقدا یاشاییب، گؤزل عؤمور سوردولر.
.....گؤیدن اوچ آلما دوشدو؛ بیری دئیهنین بیری یازانین بیریسی ده اوخویانین.....
سون.
تاریخ
2020.04.07 / 19:47
|
مولف
Axar.az
|