واقیف صمدوغلو تورپاق آلتین‌دادی، اکرم ایلیسلی قیناق آلتین‌دا، رامیز رؤوشن دؤرد دیوار آراسین‌دادی. نه حاق دونیاسینا گئدنلرین، نه یالانچی دونیادا قالانلارین آراسین‌دا یوخسان.

هارداسان، واقیف بایاتلی؟! بیزیم شاعریمیزی: یاشیل کؤینکلی اوغلانی، قونشو تویونا اون هاسار او یانا اوینایان او اوشاغی گؤتوروب هارا گئتدین؟!

سنینچون نؤوبدن‌کنار داریخماغیم توتوب، سنی گوندمدن‌کنار یاد ائتمک ایستییرم. بورالاردا آداملاری دوغوم و اؤلوم گونلرین‌ده توپ‌دان و پراکه‌ن‌ده خاطیرلاییرلار، بیر ده فؤوق العاده حاللاردا.

اؤلمه، واقیف بایاتلی، اؤلمه!

بیزیم بو چیرکلی گون‌ده‌میمیزه گلمه، واقیف بایات‌لی، گلمه.

بیلمیرم، او ایکی دونیانین آراسین‌دا نه قدر راحتسان، سنین اولدوغون او «بئرمود اوچبوجاغین‌دا» چکیسیزیلیین هانسی فصلی‌دیر، اما هئچ سن ده بورالاردا نه باش وئردیینی بیلمه، واقیف بایاتلی، بیلمه.

یئنی‌دن حاضیرلاشیب ایکینجی دفعه ایمتاهان وئرمک ایسته‌یه‌ن طلبه‌نین معلمینی گؤرمک ایستدیی کیمی گؤرمک ایستییرم سنی. ایندی منه آیدین‌دی، «یاخشی آداملاری لاپ چوخ، پیسلری ده هئچ اولماسا بیر آز ایسته‌مک» نه دئمکدی. من ایندی بیلیرم، پیسلری هئچ اولماسا بیر آز ایسته‌مک اصلین‌ده نئجه «داشینماز» بیر سئوگی‌دی. من ایندی سئوینجین بوتون آنتونیملرینی، روحون بوتون نوتلارینی، حس‌سین بوتون چالارلارینی اؤیرنمیشه‌م. من ایندی بیلیرم، گول دوزلتمک ایستدیین آداملاری گیل‌دن دوزلتمک نئجه آغیردی. بیز آخی شاعر ایدیک، نیه هر طرفیمیز هیکللرله دولدو؟! بلکه، بو سوالین جاوابینی بیلیرسن، اما سن یئنه ده دینمه، واقیف بایاتلی، دینمه.

بو یاخینلاردا موسی یاقوبون گؤزلرین‌ده چارسیزلیین شکلینی گؤردوم. سؤزون بیتدیی یئرده دایانیب هر شئیی سؤزسوز آنلاماق دردی ده وارمیش شاعرلرین. اوردان او یانا نقطه‌دی، اوردان او یانا سوسار شاعرلر. یورولوب سلاحینی آتان دؤیوش‌چولر کیمی.

هردن صابیر روستمخانلییلا دردلشیرم. من مبندانی ایفاده ائتممیش، او، جمله‌نین خبرینی دئییر. و بیر داها آنلاییرام کی، بو دونیادا موطلق حقیقت وار، موطلق وار. بیز اونو اؤزوموزدن اوزاقلاش‌دیرماق اوچون گاه پافوس، گاه اوبرازلی‌لیق، گاه سئنتیمئنتالیزم، گاه بدیعی‌لیک آدلان‌دیریریق، قاچیب ایچیمیزده‌کی سویوققانلیلیغا، رئاللیغا قیسیلیریق. ائله قاپینی اؤرتوب ایچری گیره‌ن کیمی حقیقت بیزه پنجره‌دن باخیب گؤز وورور.

اونا گؤره ده بوتون یاشلاردا، بوتون بده‌نلرده‌کی شاعر روحلاری داریخیر سؤزون بوتون معنالارین‌دا. من اونلارین حاق‌لی اولانینی لاپ چوخ، حاق‌سیز اولانینی دا هئچ اولماسا بیر آز آنلاییرام. و بو یازی‌دا آدینی چکدییم و چکمدییم بوتون یازی‌چیلاری‌می ایتیرمک‌دن قورخورام. اونلار منیم اوشاق‌لیق خیاللاریمین سرکرده‌لری ایدیلر. من دؤیوشون سونون‌دا سرکرده‌سیز قالمیش بیر اسکر کیمی باشیما گولله سیخماق ایستییرم.

یقین چوخ آغیر هیسس‌دی باشینا گولله چاخماق ایسته‌یه‌ن عسگرین سرکرده‌سی اولماق.

ائله بونا گؤره ده گلمه، واقیف بایات‌لی، گلمه.