گونئی آذربایجانین ماراق‌لی نووروز عادت-عنعنه‌لرینی اجرا ائد‌ن شهرلریندن بیری ده تبریزدیر.

Kult.az تبریز بؤلگه‌سینین نوروزلا باغلی بیر نئچه عادت و عنعنه‌سینی تقدیم ائدیر:

تبریزده نووروز سفره‌سینه عنعنوی پلوو، چرز و شیرنیاتدان علاوه، اطرافینا یانان شاملار دوزولموش گوزگو (ایشیقلی حیاتین رمزی حساب ائدیلیر)، ایچریسینده‌کی سودا خیردا بالیق و یا یاشیل یارپاق اولان فینجان (بو عادت بئله بیر تصوره اساس‌لانیر کی، بالیق و یا یارپاغین حرکتی ایله ایلین تحویل اولوندوغو آنی معین ائتمک اولار)، بویانمیش یومورتالار و س. قویولور. ائودکی قادینلار پالتارلارینا سانجاق تاخمالیدیرلار. نووروزون سحری گونو تئزدن ائوه گلن ایلک آدام کیشی اولارسا، بو یاخشی علامت، قادین اولارسا، بو پیس علامت حساب ائدیلیر.

عمومیتله گؤتوردوکده ایسه، آخیر چرشنبه گونو ایله مقاییسه‌ده، نوروز گونلری چوخ ساکت و تمکینلی بیر شرایط‌ده کئچیر. بو حال گونئی آذربایجانین باشقا بؤلگه‌لرین‌ده، همچینین، قوزئی آذربایجان‌دا دا اؤزونو گؤستریر. ملیکه‌لرین و وفات ائتمیش آداملارین روحونون محض همین گون یئره ائنمه‌سی شرفینه کئچیریله‌ن ایلاخیر چرشنبه قدیم دؤورلرده ده داها طنطه‌نه‌لی بیر شرایط‌ده کئچیریلیردی. بو عنعنه‌نین آذربایجان‌دا یاشاماسی اؤلکه‌میزده نووروز عنعنه‌لرینین داها صاف شکیل‌ده ساخلانیلماسینا دلالت ائدیر. بو حالی بیز گونئی آذربایجان‌دا یاشایان آیری-آیری تورک طایفه و ائللری ایچریسین‌ده ده گؤروروک. بئله کی، ایران‌لی اتنوقرافلارین معلوماتینا اساساً خلکان‌لو ائلی نووروز بایرامینی او قدر ده موهوم حساب ائتمیر، آنجاق نووروزدان اول گلن آخیر چرشنبه‌یه نووروزدان دا آرتیق اهمیت وئریر. همین گئجه اونلار ان یاخشی یئمکلرینی بیشیریر، آتشفشان‌لیق ائدیر و گئجه یارییا قدر بایرام کئچیریرلر...