سون گونلرده ایرانین معین دایره‌لرینده آذربایجانا قارشی چیرکین سیاست و دین خادیملرینین، ائل‌جه‌ده رسمی مئدیانین آنتی‌آذربایجان سیاستی گونده‌م‌ده‌دیر. بیر چوخ آذربایجانلی «ضیالی» گونئی آذربایجانلیلارا «نیه اعتراض ائتمیرسیز» دئیه سسله‌نیر و حتی آغیر سؤزلر ده (قول، نؤکر و س.) دئییر.

هامیمیز بیلیریک کی، ایراندا حاکم دایره‌لر و بیر سیرا دئستروکتیو قوروملار ایران و آذربایجان مناسیبتلرینین دایم گرگین قالماسیندا، آنتی‌تورک و تورکوفوبییا حیسلری‌نین گوجله‌نمه‌سینده، آذربایجان و تورکییه تمثالیندا تاریخی دوشمن اوبرازی یاراتماقدا ماراقلیدیرلار. آرا-سیرا ایران رسمی کاناللاری و غیری-رسمی کیو-لری آذربایجان و آنادولو تورکلرینی تحقیر ائدیر، دولت باشچیلارینا، تورک لیدرلرینه و تاریخی شخصیتلرینه قارشی تحقیرآمیز ایفاده‌لر ایشه‌لدیلیر. بعضی حاللاردا رسمی شخصلر، میللت وکیللری و حاکمیتده تمثیل اولونان رسمیلر بئله آذربایجان و تورکییه‌یه قارشی خوشاگلمز فیکیرلر بیلدیریر.

ایرانین بئله سیاستی بعضی حاللاردا آذربایجان و تورکییه رسمی دایره‌لری واسطه‌سی ایله اعتراضلارلا قارشیلانسا دا، عمومیتله، آذربایجان و تورکییه‌نین ایرانین بئله عمللری قارشی‌سیندا سیاستی کیفایت قدر سرت اولماییب. بونون سببی بعضا دیپلوماتیک ائتیکا قایدالاری اولسا دا، بیر چوخ حالدا ایران دینی رهبرلرینین و رسمیلرینین حیله‌گرلییی سوییه‌سینه چاتا بیلمه‌مه‌ییمیزدیر. داها دقیق دئسم، بو قدر اخلاقسیزلیغی دولت و میللت اولاراق باجارماماغیمیزدیر.

ایران کیو-ی واختی ایله تورکلری «حامام بؤجکلری»نه اوخشاداندا آذربایجان و تورکییه ایرانا قارشی هئج بیر اعتراض ائتمه‌دی.

ایراندا میلیونلارلا تورک اعتراض آکسیالارینا قالخاندا آذربایجان و تورکییه ایرانین داخیلی ایشلرینه قاریشمادی – آنجاق ایران هر یئره بورنونو سوخور.

دفعه‌لرله تبریز اونیورسیته‌تینده آذربایجان تورکلرینه قارشی حیاتا کئچیریلن هجوملار و طلبه‌لره قارشی زوراکیلیق، قتل و دیگر خوشاگلمز تحقیرلر باش وئره‌ن‌ه آذربایجان و تورکییه سرت بیانات وئرمه‌دی.

اورمو گؤلونون قورودولماسینا قارشی اعتراضلاردا حبس ائدیلن و اشگه‌نجه‌لره معروض قالان انسانلارا قارشی آذربایجان و تورکییه لاقید قالدی.

اورمو گؤلونون قورودولماسینا قارشی سویداشلیق موقعییندن اولماسا بئله، رئگیون دولتی اولاراق و اورمو گؤلونون قوروماسیندان زیان چکن اراضی دولتلری اولاراق دا اعتراض ائد‌ن اولمادی.

بو دؤورعرضینده دفعه‌لرله تبریزده، اردبیل‌ده، اورمودا و دیگر شهرلرده قاراباغی دستکله‌دیکلرینه، خوجالی سویقیریمینی گونده‌مه گتیردیکلرینه، آذربایجان اوردوسونا دستک مئساژلاری گؤندردیکلرینه گؤره بیر چوخ گونئی آذربایجانلی میللی فعال حبس ائدیلیب، ایشگه‌نجه‌لره معروض قالیب. آذربایجان و تورکییه دولت اولاراق هانسی سیاسی محبوسا یاردیم ائدیب و یا سیاسی فعالین حقوقلارینین قورونماسینا چالیشیب؟ هانسی بین‌الخالق حقوق و انسان حاقلاری تشکیلاتلارینا مسئله ایله باغلی مراجعتلر اولوب؟

آذربایجان ۳۰ ایلده‌ن چوخدور دولت مستقیللیینی الده ائدیب. گونئی‌ده یاشایان آذربایجان‌لیلار بونا سئوینیر. بیز گونئیلیلر سئویندیک کی، اراضیلریمیزین بیر حیصه‌سینده دولتیمیز برپا اولوندو. مستقیل آذربایجان دولتیمیز یئنیدن قورولدو. اما بیز بو دولتی اؤزوموزونکو بیلدییمیز قدر دولتیمیز بیزی اؤزونونکو سایمیر.

بیز گونئیلیلر هر شئیی باشا دوشوروک و بیلیریک. آذربایجانین ضعیف اولان گونلرینده گیلئیلنمه‌یی بئله اؤزوموزه روا بیلمه‌دیک. بوتون اولانلاری و گونئیلیلره قارشی لاقیدلییی اورییمیزده گیزلتدیک. اعتراض بئله ائتمدیک. اما ایندی آرتیق گوجلو آذربایجان دولتی وار.

پرزیدنتیمیزین فعالیتلری نتیجه‌سینده بؤیوک دولتلر قارشی‌سیندا دیک دایانا بیله‌جک، اونلارین تضییقلرینه اییلمه‌یه‌جک بیر دولت قورولوب. دنیانین ان گوجلو دولتلری قارشی‌سیندا اؤز حاقینی و دولتچیلیینی، ائلجه ده وطنداشلارینین حقوقلارینی مدافعه ائده بیلن بیر دولتیمیز وار!

ایندی آرتیق آذربایجان ۴۰ میلیونلوق آذربایجانلی‌نین‌دا حقوقلارینی قورویاجاق گوجده‌دیر!
پرزیدنت اؤزو ده بیلدیریب کی، آذربایجان ۵۰ میلیونلوق آذربایجانلی‌نین وطنی‌دیر. ایندی دولت سیاستی ده بو استقامتده اولمالی‌دیر، دولت پروگرامی و ایستراتگییاسی اورتایا قویولمالیدیر.

ایران دولتی آذربایجانا قارشی سلاح‌ی دسته‌لر یاراتماقدان چکینمیر. «حسینیون» و «فاطمیون» تشکیلاتلارینی یارادیب مالیه‌لشدیریر. اونلارا حربی و سلاحلی مبارزه تعلیملری کئچیریر. سورییادا، لیوان‌دا و دیگر مناقیشه‌لی یئرلرده اونلاردان استفاده ائدیب تجربه توپلامالارینا، حاضرلانماسینا چالیشیر. آذربایجان رسپوبلیکاسی اراضی‌سینده میللت وکیلینه و دیگر وطنداشلارا قارشی ترور حادثه‌لری تؤره‌ده بیلیر. ایران‌دا اوتوران هر هانسی بیر «مجتهد» و یا «دین خادیمی» آذربایجان وطنداشلارینی ترورا تشویق ائده، قتللره «فتوا» وئره بیلیر. و یاخود بیر «ایالت موللاسی» آذربایجان و تورکییه پرزیدنتینلرینه قارشی تحقیرلر یاغدیرا، حتی تحقیرآمیز افاده‌لر ایشله‌دنلره شرایط یارادیب، مجلیسلر قورا بیلیر.

اما بیز اؤز سویداشلاریمیزین حاقینی دئیه، اونلاری قورویا بیلمیریک؟
مینلرله آذربایجان رسپوبلیکاسی وطنداشی قم، تهران، مشهد و دیگر شهرلرده پولسوز-پاراسیز ایران دولتی‌نین دینی مرکزلرینین حسابینا تحصیل آلیر، آذربایجانا قارشی تشکیلاتلارا جلب ائدیلیر. بعضی حاللاردا اونلارین بیر چوخو آذربایجانا گؤندریلیر و ایرانین دینی تبلیغاتچی‌سینا چئوریلیر.

بس آذربایجان اونیورسیته‌لری و تحصیل دایره‌لری هانسی گونئیلی‌نین آذربایجان‌دا اوخوماسینا شرایط یارادیب؟ اونلارا هانسی علمی تحصیللر وئریلیب؟ اورادا یاشایان آذربایجانلیلارین معاریفله‌نمه‌سی اوچون هانسی کادرلارین حاضرلانماسی حیاتا کئچیریلیب؟ گونئیلی‌لرین دیل، تاریخ، حقوق، اداره‌ائتمه و دیگر علملرینی گوجله‌ندیرمک اوچون هانسی تدبیرلر گؤرولوب؟

آذربایجان‌دا یاشایان گونئی آذربایجانلی میگرانتلار افغان، چچن، سورییالی میگرانتلاردان نه ایله فرقله‌نیر؟ هانسی علاوه حقوقلارا مالیکدیرلر؟ آذربایجاندا یاشایان گونئی آذربایجان‌لیلارین وطنداش قدر حقوقلاری اولمالی دئییل‌می؟