ایندی یاخین شرق هر زامانکین‌دان داها چوخ تهلوکه‌لی اوچورومون آستاناسیندادیر. ایران ایله اسرائیل آراسیندا آرتان تهدیدلر و گرگینلیین شدتله‌نمه‌سی، اوولکیندن داها تهلوکه‌لی و داغیدیجی بیر محاربه‌یه حاضرلیق گئتدیینه دلالت ائدیر. تهران و تل-آویوین گئتدیکجه یایدیقلاری تهدید بیاناتلاری اسرائیل و ایران آراسیندا بیرباشا حربی قارشیدورمانین ایکینجی راوندونون گؤزله‌نیلن‌دن تئز باشلایاجاغینا هئچ بیر شبهه یئری قویمور.

هر ایکی طرفین قیمتلندیرمه‌لری اونو گؤستریر کی، گله‌جک قارشیدورما تامامیله فرقلی کاراکتر داشییاجاق و اونون نتیجه‌لری آغیر اولاجاق. ایون محاربه‌سین‌ده قیسما غلبه قازانان تل-آویو یاخشی بیلیر کی، اسرائیلین فاصیله‌لی ضربه‌لر و واخت‌آشیری هجوم سیاستی ایرانین راکت آرسئنالینی یئنی‌دن قورماسینین و هاوا هجومون‌دان مدافعه‌نی گوجلندیرمه‌سینین قارشیسینی آلماق اوچون تکرار هجوملار طلب ائدیر. اسرائیل لیدرلری ایون محاربه‌سینین اسرائیل و ایران آراسیندا قارشیدورمادا یالنیز «بیرینجی فصل» اولدوغونو بیان ائتدیلر. بو دا اونلارین واشینگتونو ایرانا قارشی مبارزه‌یه جلب ائتمک اوچون آمریکادا کئچیریلمه‌سی نظرده توتولان آرالیق سئچکیلری اؤنجه‌سی فرصت‌دن استفاده ائد‌رک یئنی‌دن ضربه ائندیرمک عزمین‌ده اولدوقلارینی گؤستریر.

باشقا طرفدن، ایران ایون محاربه‌سی تجربه‌سین‌دن مهم درسلر چیخاریب و آنلاییب کی، حسابلانمیش و مرحله‌لی جواب سیاستی اسرائیلین مدافعه سیستملرینین سددینی قیسما کئچه بیلسه ده، بو اؤلکه‌نین ایرانا هجومونون قارشیسینی آلا بیلمه‌ییب. تهران باشچیلارینین خبردارلیقلاری، خصوصیله ایران پارلامنتینین صدری محمد باقر قالیبافین «تمکین سیاستی سونا چاتاجاق» و «یئنی جبهه‌لر آچیلاجاق» بیاناتلاری دا گله‌جک محاربه‌نین ماهیتینین دییشمه‌سیندن خبر وئریر.

گؤرونور، ایران اسرائیلین اونو مغلوب ائتمک قابیلیتینه دایر تصوورو آرادان قالدیرماق اوچون گله‌جک محاربه‌نین باشلاندیغی آندان سرعتلی و حل‌ائدیجی هجوما حاضیرلاشیر.

بیر نئچه گو اول ایران اوردوسونون راکت تعلیملری ده تهرانین محاربه‌نین قاچیلماز اولدوغو قناعتینه گلدیینی و بونا گؤره ده اوولکیندن داها فرقلی راکت هجوملاری ایله بالانسی قوروماغا حاضیرلاشدیغینی گؤستریر.

بونونلا یاناشی ایران پرزیدنتی مسعود پزشکیانین بلاروسا سفری زامانی آلکساندر لوکاشنکودان هاوا هجومون‌دان مدافعه سیستملرینین ایرانا وئریلمه‌سی و اؤلکه‌نین زده‌لنمیش مدافعه سیستمی‌نین برپاسی ایله باغلی خواهیشی ده، آیتوللاهلارین اسرائیلین هجومونا حاضیرلاشدیقلارینا دلالت ائدیر.

عینی حالدا بعضی ایرانلی دیپلومات و میللت وکیللرینین، خصوصیله محافضه‌کار سیاسی جریانا منصوب شخصلرین "اسراپیلین یئنی‌دن هجوم ائدجه‌یی تقدیرده بوتون بؤلگه‌نی اودا چکه‌جکلری" مضمونلو تهدد بیاناتلاری، تهرانین محاربه‌نین ایکینجی راوندوندا مغلوب اولاجاغیندان قورخدوغونو گؤستریر.

بئله‌لیکله، علی خامنه‌ای و اونون اطرافیندا اولان رادیکال سیاستچیلرین، اؤلکه‌نین سیاسی و اقتصادی گوجونو الینده توپلایان سپاه و "بسیج" کوماندیرلرینین تهدید بیاناتلاری فونوندا قارشیلیقلی ائسکالاسییا رئگیونو تهلوکه ایله اوز-اوزه قویور.