سوریادا حاکمیت دییشیکلییندن سونرا روسیایا قاچان دئوریلمیش پرزیدنت بشار اسدین عائله‌سی مسکوادا دبدبه‌لی حیات سورور.

Axar.az خبر وئریر کی، بو باره‌ده «نیو یورک تایمز» اسدین قوهوملارینا، عائله دوستلارینا و کئچمیش سوریا رسمیلرینه استنادن معلومات یاییب.

منبع‌لر بیلدیریبلر کی، اسدی مسکواداکی فدراسییا قوله‌سینین ۶۲-جی مرتبه‌سینده یئرلشه‌ن «سیکستی» رستورانین‌دا شام ائدرکه‌ن گؤروبلر:

«بو رستوران روسیا سیاسی ائلیتاسینین عضولری و خارجی مشهورلارین سئویم‌لی مکانی‌دیر. کئچمیش پرزیدنت وی.آی.پی قوناقلاردان بیری اولوب. اسد و عائله‌سی اولجه هفته‌لیک کیرایه حاقی ۱۳ مین دلارا چاتان «فو سیزنس» هتلین‌ده یاشاییب. داها سونرا اونلار فدراسییا قوله‌سینده‌کی ایکی مرتبه‌لی پنتهاوسا، اورادان ایسه روبلیووکاداکی بیر ائوه کؤچوبلر. همچنین اسد اوفتالمولوگییا اوزره تحصیل آلیر (او، طبی تحصیلینی دمشق و لوندون‌دا آلیب). روسیا کشفیات خدمتلری اسدی قوروماغا و اونون حرکتلرینی ایزله‌مه‌یه داوام ائدیر».

قید اولونوب کی، اسدین قارداشی، رسپوبلیکا گواردییاسینین کئچمیش کوماندیری ماهر اسد ده مسکواداکی «فو سیزنس»دا یاشاییب:

«داها سونرا تانیشلاری اونو مسکواداکی «کاپیتال توورس»این یانین‌دا گؤروبلر. بشار و ماهرین قیزلاری بیرلشمیش عرب امیرلیکلرینده اؤلکه حاکمیتینین اجازه‌سی ایله یاشاییرلار. بشار اسد روبلیووکاداکی ائوینده قیزی زین اوچون دبدبه‌لی بیر ضیافت تشکیل ائدیب. ماهر اسدین قیزی شام دوبای‌دا ایکی گونلوک شنلیک کئچیریب. اولجه فرانسیز رستورانی «باگاتلله»ده، داها سونرا ایسه شخصی یاختادا».

نشر دئوریلمیش حاکمیتین کیمیوی سلاح حاضرلایان ۵۵ کئچمیش یوکسک وظیفه‌لی مأمورونو، حربی قوللوقچوسونو، کشفیات ارگان رهبرلرینی و عالملرینین یاریسینین هارادا اولدوغونو دا معین ائدیب:

«۷۹ یاشلی کئچمیش کشفیات رییسی علی مملوک مسکوادا روسیا بودجه‌سی حسابینا اؤد‌نیله‌ن منزل‌ده یاشاییر. اسد رژیمینین نارکوتیک ایمپرییاسینین لیدرلریندن بیری اولان حسن بلال دا مسکوادا یاشاییر. او، عائله‌سینین دوبایدان اسپانیایا قدر خارج‌ده‌کی راحت حیاتینین خرجلرینی اؤدییر. دینج اعتراضچیلارین گوله‌له‌نمه‌سی امرینی وئرن ۶۳ یاشلی کئچمیش حربی کومان‌دیر جمال یونس ده مسکوادا اسکوتر سوررکه‌ن گؤرونتوله‌نیب. شکنجه و جنسی تجاوزده اتهام اولونان کئچمیش مدافعه ناظیری علی عباس و باش قرارگاه رییسی ابدول کریم ابراهیم مسکواداکی «یئوروپیسک» تجارت مرکزینده گزرکه‌ن گؤرونتولنیب».