بو گون دنیا کاتولیکلری میلاد بایرامینی قید ائدیرلر.

Axar.az خبر وئریر کی، خریستیان عالمینین ان علامتدار و طنطنه‌لی مراسیملرین‌دن ساییلان میلاد بایرامی عنعنه‌یه گؤره عیسی مسیحین ویفلیم شهرین‌ده دنیایا گلمه‌سینین شرفینه قید اولونور.

دنیا خریستیانلاری منصوب اولدوقلاری مذهبلره گؤره بو بایرامی مختلف گونلرده (۲۵ دکابر و ۶-۷ یانوار) کئچیریرلر و او حاضردا یوزدن آرتیق اؤلکه‌ده رسمی دولت بایرامی ساییلیر.

میلاد بایرامی اهالی‌سینین اکثریتینی خریستیانلارین تشکیل ائتدیی بیر چوخ اؤلکه‌ده غیری-ایش گونو حساب ائدیلیر. آنجاق خریستیان اهالینین چوخلوق تشکیل ائتمدیی هیندیستان و مالایزییا کیمی اؤلکه‌لرده ده بو گون رسمی تعطیل‌دیر.

بایرامی قید ائد‌ن اؤلکه‌لرین اکثریتین‌ده مغازالارین چوخو همین گون باغلی اولور. مثلاً، اینگیلتره‌ده ۲۵ دکابردا هئچ بیر اجتماعی نقلیات واسطه‌سی ایشلمیر.

میلاد بایرامینین ان عوض‌ائدیلمز آتریبوتلاریندان بیری ده طبیعی کی، سانتا کلاوس، یعنی شاختا بابادیر. اونون اوبرازینین الهام منبعی کیمی ۴-جو عصرده یاشامیش مقدس نیکولاس قبول ائدیلیب.

خارجی اؤلکه‌لرده بایرام حاضرلیغی بیر نئچه آی اولدن باشلاییر، بؤیوک شؤوق و طنطه‌نه ایله حیاتا کئچیریلیر. بو ارفه‌ده ائولرده و مختلف اجتماعی مکانلاردا شام آغاجلاری بزدیلیر و کوچه‌لر ایشیقلاندیریلیر. میلاد ارفه‌سی شام آغاجی بزه‌مک عادتینین ایلک دفعه ۱۶-جی عصرده آلمانییادا میدانا گلدیی و آوروپایا بورادان یاییلدیغی گمان ائدیلیر.

عنعنوی میلاد سفره‌سینی هیندتویوغو و تروز بزییر. بونونلا بئله، بایرام سفره‌سینه دوزولن تعاملار آیری-آیری خالقلارین عادت-عنعنه‌سینی ده اؤزونده عکس ائتدیریر. بئله کی، سیجیلیادا بایرام ماساسینا ۱۲ نوع بالیق قویولور. بیرلشمیش کرال‌لیق و اونون عادتلرین‌دن تاثیرلنمیش اؤلکه‌لرده سفره‌ده هیندتویوغو، گاز اتی، ات سویو، کارتوف و تروزلر اولور. سفره اوچون خصوصی دسرتلر ده حاضرلانیر کی، بونلاردان دا باش‌لیجاسی میلاد پودینقی، شیرین پچنیلر و میوه‌لی پیروقلاردیر.

قید ائدک کی، آذربایجان‌دا کاتولیک کیلسه‌سینده هر ایل میلاد بایرامیندا دعا اوخونور. پرزیدنت الهام علیئو هر ایل میلاد بایرامین‌دا کاتولیکلری تبریک ائدیر.