مسکو اوکراین اراضی‌سینین تخمیناً ۱۱ فایزینی تشکیل ائد‌ن دونباسی ایسته‌ییر.

Axar.az خبر وئریر کی، بونو آمریکا دولت کاتیبی مارکو روبیو دئییب.

روبیونون سؤزلرینه گؤره، روسیه هله‌لیک دونباسی تام حربی یوللا اله کئچیره بیلمیر، اوکراین ایسه بو اراضینی روسیه‌یه کؤنوللو شکیل‌ده وئرمه‌یه راضی دئییل:

«بونو دئمک ایستردیم: انسانلار هله ده بونون اوکراین‌دا گئدن محاربه اولدوغونو دئییرلر. اما بو محاربه دونباس اوغروندادیر. صحبت اؤلکه‌نین یالنیز بیر رئگیونون‌دان گئدیر. اصلینده، اؤلکه اراضی‌سینین تخمیناً ۱۱ فایزینی تشکیل ائد‌ن بیر اراضی‌دن دانیشیریق. روسیه همین اراضینی اله کئچیرمک ایسته‌ییر، لاکین بونو حربی یوللا باجارمیر. اوکراین ایسه بو اراضی‌دن امتناع ائتمک ایسته‌میر».

عینی زامان‌دا، آمریکا دولت کاتیبی اوکراینین دونباسی ایتیرمه‌یه راضیلاشماماق اوچون جدی اساسلارینین اولدوغونو اعتراف ائدیب. اونون سؤزلرینه گؤره، بو مسئله دولتین سووئرئنلییی و اوزون‌مددت‌لی تهلوکه‌سیزلییی ایله باغلی‌دیر.
روبیونون فیکرینجه، حاضردا اساس وظیفه هر ایکی طرفین محاربه‌نین باشا چاتماسی اوچون معین گذشتلره گئتمه‌یه راضی اولاجاغی کومپرومیس واریانتی تاپماق‌دیر:

«بو محاربه حربی یوللا باشا چاتمایاجاق. اونا یالنیز دیپلوماتیک یوللا سون قویماق ممکن‌دور. مسئله اوندادیر کی، ائله بیر نتیجه‌یه نایل اولماق ممکن‌دورمو کی، هر ایکی طرف اؤزو اوچون معین فایدا الده ائتسین، عینی زامان‌دا گذشتلره گئتسین و ندن‌سه امتناع ائتسین؟»

قید ائدک کی، روسیه کونستیتوسییاسینا یالنیز دونتسک و لوگانسک ویلایتلرینی دئییل، هم ده زاپوروژیه، خرسون ویلایتلرینی و کریمی داخیل ائدیب.