البابدا هانسی شکیلده مباریزه آپاردیقسا، راککادا دا همین اصوللا عملیاتلار کئچیرجییک.

آخار. آذ خبر وئریر کی، بو سؤزلری تورکییه باش ناظری بینعلی ییلدیریم امئریکا پرزیدنتینین معاونی مایک پنس ایله قاپالی کئچن گؤروشوندن سونرا دئییب.

«راککادا آزاد سورییا اوردوسونا دستک وئرن حربی قولریمیز وار. چوخ گومان کی، اونلار دا عملیاتا دستک وئره‌جکلر. آرتیق امئریکا رهبرلییی ایله یئنی بیر صحیفه آچیریق.آمئریکایا دئدیک کی، بیز البابدان سونرا کئچیریله‌جک عملیاتلارا دا باشلاماغا حاضیریق. آنجاق بیر شرطله کی، دیگر ترور قروپلاشمالاری بو عملیاتین ایچینده یئر آلماسین. زننیمجه، بو شرطیمیزی مذاکیره ائدیب قرار وئره‌جکلر»، - ییلدیریم بیلدیریب.

مایک پنسله فتوللاه گولنین تورکییه‌یه تحویل وئریلمه‌سی مسئله‌سینی ده مذاکیره ائتدیکلرینی قید ائد‌ن باش ناظر بونلاری دئییب:

«آمئریکا طرفی بیزه بیلدیردی کی، بو، حقوقی بیر مسئله‌دیر، لاکین راضی‌لیقلارا اویغون اولاراق، مسئله نین حلینه جدی شکیلده چالیشاجاقلار. اوولکی امئریکا رهبرلییی «بو، محکمه‌نین ایشی‌دیر» دئییردی. آنجاق ایندی فئتؤ مؤوضوسونا فرقلی یاناشیرلار».