آذربایجانین روسییادان آلدیغی یئنی سلاحلار همیشکی کیمی، یئنه ده ارمنیستان‌دا جدی ناراحاتلیغا سبب اولوب.

پوبلیکا. آذ خبر وئریر کی، یانوارین ۱۹-دا روسییادان یئنی حربی تکنیکانین نؤوبتی پارتییاسی آذربایجانا گتیریلیب.

مدافعه ناظیرلیینین معلوماتینا گؤره، گمیلر واسطه‌سیله روسییادان باکی لیمانینا چاتدیریلان خئیلی سای‌دا معاصر حربی تکنیکا و دؤیوش سورساتلاری کومپلکس قبولدان سونرا ان قیسا واختدا جبهه خطینده یئرلشن حربی حیصه‌لرین سرانجامینا وئریله‌جک.

روسییادا معاصر تکنیکانین باکییا گتیریلمه‌سی و قیسا مدته جبهه خطینه گؤندریلمه‌سی اوچون حاضرلانماسی ایشغالچی اؤلکه‌نین قورخولارینی داها دا آرتیریب.

ارمنیستان مئدیاسی آغیر تکنیکانین جبهه‌یه گؤندریلمه‌سینین داغلیق قاراباغدا یئرلشدیریلمیش ارمنی حربی بیرلشمه‌لری اوچون تهلوکه‌لی نتیجه‌لره سبب اولاجاغینا دقت چکیر. خصوصیله بو تیپ حربی تکنیکانین ۲۰۱۶-جی ایلین آپرل آییندا کئچیریلن دؤیوش عملیاتلاری زامانی اوغورلا تطبیق ائدیلمه‌سی، دوشمنین خئیلی سای‌دا جانلی قوه‌سی، تکنیکاسی و دیگر واسطه‌لرینین محو ائدیلمه‌سینده موهوم پایا صاحب اولماسی ارمنیلرین تشویشینی ایکی قاتا چیخاریب.

ارمنی سیاسی شرحچی سرکیس آرتسرونی یازیر کی، روسییا رئاللیقدا متفیقی ارمنیستانا قارشی چیخیر:

«آذربایجانا سلاح ساتیشیندا هئچ بیر مانعه‌لر یارانماییب، عکسینه موسکوا و باکی اوغورلا امکداشلیق ائدیر. بو ایسه آذربایجان اوردوسونون جدی شکیلده گوجله‌نمه‌سی و رسمی باکینین «اراضیلری حربی یوللا آزاد ائتمک» واریانتینا هر کئچن گون یاخینلاشماسینا زمین یارادیر. «آپرئل محاربه‌سی»نده روسییا ارمنیستانی دستکله‌مه‌دی و دقیقلیکله دئیه بیلریک کی، هر هانسی یئنی محاربه‌ده ده بو بئله اولاجاق».

سرکیس آرتسرونی ارمنیستان حاکمیتینین سوسقونلوغونو تنقید ائدیب.

«ایرواندا روسییایا اعتراض ائتمک رسورسونا مالیک دئییللر. فاکتیکی اولاراق، اؤلکه رهبرلیینده اوتورانلار قورخاق سیاست آپاریر. باکی ایسه اراضیلرین آزاد اولونماسینا هر کئچن گون داها دا یاخینلاشیر»، - دئیه او بیلدیریب.