سؤزون اصیل معناسیندا سورییادا ایران-ایسرایل محاربه‌سی آرتیق باشلاییب.

بو سؤزلری آخار. آذ-آ ایران-ایسرایل قارشی‌دورماسی ایله باغلی دانیشان سابیق دؤولت موشاویری قابیل حسینلی دئییب. پولیتولوق بیلدیریب کی، آمریکانین نووه سازیشیندن چیخماسینی بیان ائتمه‌سی اصلینده ایرانلا محاربه‌نین باشلانغیجینا بیر ایشاره ایدی:

«ایرانین عالی دینی لیدری آیت وللاه علی خامنه ای آمریکاین جدی سهو ائتدیینی و بونون جوابینین وئریلجیینی بیلدیردی. جواب دا محض ایران گنرالی قاسیم سولیمانینین باشچیلیغی ایله قودس بریگاداسیندان ایسرایلین ایشغالی آلتینداکی تاریخی سورییا تورپاقلاری اولان جولان تپه‌لرینه ائندیریلن راکت ضربه‌لری ایدی. بو فون‌دا سؤزون اصیل معناسین‌دا سورییادا ایران-ایسرایل محاربه‌سینین باشلادیغینی سؤیله‌یه بیلریک. فیکیر وئرین، نتانیاهو موسکوایا گتمزدن اؤنجه ایرانلا محاربه‌یه تام حاضر اولدوقلارینی اعلان ائتمیشدی. البته کی، بو آچیقلامانین تکجه ایسرایلین حربی پوتنسیالینا گووه‌نیلرک وئریلدینی ظن ائتمیرم. بورادا آمریکانین هانسیسا تلقینلری ده اؤز رولونو اویناییب».

پولیتولوق ایسرایل-ایران محاربه‌سینین هله کی، سورییا تورپاقلاریندا آپاریلاجاغینی دئییب:

«ایسرایل دفعه‌لرله بیان ائدیب کی، ایرانین اونا یاخین اراضیلرده اولماسینا، آرالیق دنیزینه چیخیشینا ایمکان وئرمه‌یه‌جک. ایران طرفی ایسه بو اراضیلرده «شیعه حالقاسینی» فورمالاشدیرماغا جان آتیر. یعنی هر ایکی طرف‌دن کیفایت قدر تهدید ائدیجی فیکیرلر سسلندیریلیر. عمومیتله، رئگیوندا چوخ چیخیلماز بیر دوروم یارانیب».

پولیتولوق حاضردا ایرانین داها چوخ ریسک آلتین‌دا اولدوغو قناعتینده‌دیر:

«چونکی ایران هم ده آمریکانین غضبینه گلمیش بیر اؤلکه‌دیر. ترامپ دا آچیق شکیلده بیلدیریر کی، تهرانین بعضی حرکتلری جدی تحلیل ائدیلدیک‌دن سونرا ایرانا ضربه ائندیریله بیلر. صحبت نووه تدقیقاتلارینین داوام ائتدیریلیب-ائتدیریلمه‌مه‌سیندن گئدیر. بو باش وئررسه، اوندا آمریکا دا ایرانی بومبالایاجاق. بیر سؤزله، رئگیون‌دا چوخ تهلوکه‌لی شرایط یئتیشیب. اوسته‌لیک، ایسرایل سونونجو ایران عسگری و تئکنیکاسی محو ائدیلندک محاربه‌نی داوام ائتدیرجیینی بیلدیریب. ایسرایل ایرانی سورییادان بیردفه‌لیک ووروب چیخارانا قدر گئری چکیلمه‌یه‌جک. طبیعی کی، بو فون‌دا ایران دا ایسرایله قارشی «شهاب»لارینی ایشه سالاجاق. محاربه‌نین ایلک مرحله‌سی آرتیق باشا چات‌سا دا، ایکینجی مرحله داها تهلوکه‌لی اولاجاق. ایسرایلین اوستونلوک قازاندیغی گؤز اؤنون‌ده‌دیر، آنجاق ایرانین بونا سرت جواب وئرجیینی ده نظردن قاچیرماماق لازیمدیر».

قید ائدک کی، ایرانین قودس بریگاداسی بو گئجه سورییا اراضی‌سیندن ایسرایلین جولان تپه‌لرینده‌کی مؤقعلرینه راکئت ضربه‌لری ائندیریب. هوجوما مشهور ایران گنرالی قاسیم سولیمانی رهبرلیک ائدیب.

ایسرایل ایسه سورییادا ایرانین ۳۵ حربی اوبیکتینه جواب ضربه‌سی ائندیریب.