شرقی آذربایجان ایالتین‌ده کلیبر مئشه‌لری و یامچینین اوتلاق ساحه‌لرین‌ده باش وئره‌ن یانغین اراضییه چوخلو زیان ووروب.

آخار. آذ خبر وئریر کی، چرشنبه گونو آخشام ساعتلارین‌دا باش وئره‌ن یانغین آزی ۵ ساعت داوام ائدیب، نتیجه‌ده ۹ هکتار مشه ساحه‌سی یاناراق سیرادان چیخیب.

اینسان طرفیندن تؤردیلدیی بیلدیریله‌ن یانغین «قاسیم کندی» قصبه‌سینین اطراف اراضیلرین‌ده باش وئریب.

مرندین یامچی منطقه‌سین‌ده ایسه اوتلاق و بوغدا ساحه‌لری یانغینا معروض قالیب.

شرقی آذربایجان والیلیینین تعجیلی یاردیم مرکزینین رئیسی محمدباقیر هنربر حادثه نتیجه‌سین‌ده یامچینین یکانات منطقه‌سین‌ده ۱۵ هکتار اراضینین یاندیغینی بیل‌دیره‌رک هله‌لیک دیه‌ن زیانین حجمی باره‌ده دقیق معلومات اولمادیغینی دئییب.

یامچینین بخشداری بهرام ملکی (بخشداری ایجرا حاکمیتینین تابعلیین‌ده اولان بیر اورگاندیر) ده حادثه‌یه مناسیبت بیلدیریب.

«یانغین اینسان طرفین‌دن، لاکین سهوه‌ن تؤردیلیب. حادثه نتیجه‌سین‌ده ۶ هکتار بوغدا و ۹ هکتار اوتلاق ساحه‌سی یانیب. بونون نتیجه‌سین‌ده اکینچیلره ۱ میلیارد ریال زیان دییب.»- دئیه او بیلدیریب.

بهرام ملکی بؤلگه‌ده یانغینسؤندوره‌نین اولمادیغیندان یانغینین گوجله سؤندورولدویونو دئییب. «جلفا، هادیشهر، یامچی و مرندین یانغینسؤندوره‌نلری حادثه یئرینه گئدیب. لاکین اراضی‌دن ۸۰ کیلومتر اوزاق اولدوغوندان یانغین گئج سؤندورولوب و اکینچیلره داها چوخ زیان دییب. بئله حادثه‌لری اؤنله‌مک اوچون منطقه‌ده یانغینسؤندوره‌ن ماشینلار و خیلاص ائدیجی قروپ اولمالیدیر.»- دئیه او وورغولاییب.