ایرانین ناظیرلر کابینئتینین ۱۱ سنتیابر (۲۰ شهریور)، چرشنبه گونو کئچیریله‌ن ایجلاسین‌دا، تحصیل ناظری محسن حاج‌میرزایی غیری-رسمی دینلردن اولان شاگیردلرین تحصیل آلماسی ایله باغلی دئییب: «شاگیردلر اؤلکه‌نین رسمی دینین‌دن باشقا دیگر دینلره سیتاییش ائتدیکلرینی بیلدیرسه‌لر و بونون بیر نؤع تبلیغات آکتی اولدوغو ساییلسا، اونلارین مکتبلرده تحصیل آلماغی قاداغاندیر».

گؤرونور، حاج‌میرزایینین بو چیخیشی بعضی اینسان حقوقلاری قایناقلارینین سون ایکی گون‌ده بیر بهایی شاگیردین سمنانین لیسیلریندن بیرینده تحصیل آلماغینا قاداغا قویولماسی ایله باغلی یایدیقلاری خبرلره جواب‌دیر.

بو منبع‌لره گؤره، سمنان‌دا بیر لیسئی، ویلایتین تحصیل ایداره‌سینین قراری ایله بیر شاگیردی "بهایی دینینه منصوب اولماسی سببی ایله اورتا مکتبین اوچونجو صینفینه" قبول ائتمکدن ایمتینا ائدیب.
تحصیل ناظری دینی اعتیقادین هان‌سی فورمادا تبلیغات ساییلماسی ایله باغلی معلومات وئرمه‌ییب.
ایران ایسلام رسپوبلیکاسی کانستیتوسییاسینین ۳۰-جو ماده‌سینه اساساً، "حکومت بوتون اینسانلاری اورتا تحصیلی بیتیرندک پل‌سوز درس وسایتی ایله تعمین ائتمه‌لیدیر".

آنجاق بعضی بهایی وطنداشلارین سوسیال مئدیادا یازدیقلارینا گؤره، محض بهایی دینینه منصوبیتین بیلدیریلمه‌سی شاگیرد و طلبه‌لرین تحصیل موصسه‌لرین‌دن قووولماسی اوچون کیفایت ائدیر.

سون ۴۰ ایلده ایران‌دا یاشایان بهاصی وطنداشلار تئز-تئز تضییقلره، او جمله‌دن ایش یئرلرینین باغلانماسی، تحصیل حاقین‌دان محروم اولماق، قبیرلرین داغیدیلماسی و حبس جزالارینا معروض قالیبلار.