خالخال‌دا حاضردا زیبیللرین قویلاندیغی یئر بو شهری چیرکلندیریر.

بو سؤزلری اردبیل ویلایتی اطراف موحیطین محافظه‌سی باش ایداره‌سینین رئیسی سعید شهند دئییب. او بیلدیریب کی، مؤوضوع ایله باغلی دفعه‌لرله خالخال بلدییه‌سینه خبردارلیق ائدیلیب:

«خالخال بلدییه‌سینه بیر نئچه دفعه خبردارلیق ائتمیشیک کی، زیبیللرین دفن اولوندوغو یئری دییشسین، بونون اوچون یئنی یئر آییرسین. لاکین بلدییه بیزیم خبردارلیقلاریمیزا محل قویمایاراق زیبیللری بو یئره داشیییر. بو، بیرباشا شهر ساکینلرینین ساغلاملیغینا و چؤل حیوانلارینا منفی تأثیر ائدیر. گون عرضین‌ده شهرده توپ‌لانان ۶۰ تون‌دان چوخ زیبیل، همچینین، کند یئرلرینده توپ‌لانان زیبیللر بو یئره بوشالدیلیر. زیبیللرین اوزرین‌ده کیفایت قدر تورپاق قاتی اولمادیغی اوچون عفونت ایگی بیر نئچه کیلومتره قدر گئدیب چاتیر. بوندان علاوه زیبیللرین بیله-بیله یاخود سهوا یاندیریلماسی نتیجه‌سین‌ده عمله گلن توستو و ایی-قوخو داها اوزاقلارا گئدیب چاتیر، یئرلی اهالییه پیس تأثیر ائدیر. بو حجم‌ده زیبیل و توللانتیلارین یاشاییش یئرینه، او جمله‌دن، خسته خانایا یاخین بیر یئرده توپلانماسی، اونلاردان گلن عفونت ایگی و اوندان آخان عفونتله دولو سولار آشاغی‌دا یاشایان اینسانلارین ساغلام‌لیغینی بیرباشا هدفه آلیر. حاضردا زیبیللرین توپلاندیغی یئر حسارلانماییب و زیبیللرین اطرافا یاییلماسی قارشی‌سینی آلماق اوچون کیفایت قدر تورپاق قاتی ایله اؤرتولمه‌ییب. بلدییه‌یه ۱۵ گون محلت تعیین ائدیلسه ده، بو باره‌ده هله هئچ بیر آددیم آتماییب».