آمریکا – ایران گرگینلیین‌دن سونرا بو گون ایران‌دا باش وئره‌ن طیاره قزاسی دیگر هاوا یوللاری شیرکتلرینی بو بؤلگه‌ده اوچماق‌دان چکیندیریب.

آخار. آذ خبر وئریر کی، ایرانین عراق اراضی‌سین‌ده آمریکا حربی قوه‌لرینه راکت هجوملاری ائتمه‌سی ده بو اؤلکه‌نی آویاشیرکتلرین قارا سیاهی‌سینا سالیب.

آرتیق دونیانین بیر چوخ بؤیوک هاوا یوللاری شیرکتلری ایران و عراق اوزرین‌دن اوچوشلاری دایاندیریبلار.

فرانسانین «آیر فرانس» شیرکتینین سؤزچوسو بیلدیریب کی، هاوا هجوملاری ایله باغلی خبرلرین آردین‌دان احتیاط تدبیری اولاراق ایران و عراق هاوا مکانی اوزرین‌دن بوتون اوچوشلاری تاخیره سالماق قراری وئریبلر.

هوللاندییانین کا.ال.ام شیرکتین‌دن بیلدیریلیب کی، نؤوبتی خبردارلیغا قدر ایران و عراق هاوا مکانی اوزرین‌دن اوچوشلار دایاندیریلیب. بوتون اوچوشلار جنوب-شرقی آسییا و یاخین شرق‌ده‌کی دیگر ایستیقامتلره آلتئرناتیو یوللارلا یئرینه یئتیریله‌جک.

آلمانییانین «لوفتهانزا» شیرکتی ایسه ایران و عراق اوزرین‌دن اوچوشلاری دایاندیرماقلا یاناشی، تهرانا گونده‌لیک اوچوشونو لغو ائتدیینی بیلدیریب. علاوه اولونوب کی، شنبه گونو عراقین شیمالین‌داکی اربیل شهرینه ده اوچوش اولمایاجاق.

بیرلشمیش عرب امیرلیکلرینین «امیراتس آیرلین» و اوجوز قیمته اوچوش حیاتا کئچیره‌ن «فلیدوبای» شیرکتی ده بغدادا اوچوشلاری لغو ائدیب.

آوسترالییانین «قانتاس» شیرکتی ایسه لوندون-پئرته (آوسترالییا) ریسلرینین آلتئرناتیو بیر مارشروتلا اوچاجاغینی آچیقلاییب.

سینگاپور و مالایزییا هاوا یوللاری دا ایران اوزرین‌دن اولان اوچوشلاری باشقا ایستیقامته یؤنله‌ن‌دیره‌جکلرینی بیلدیریب.

«ویتنام آیرلاینس» گؤزله‌نیله‌ن تهلوکه‌نین قارشی‌سینی آلماق اوچون مارشروتلاردا مووافیق دوزلیشلر ائدجیینی آچیقلاییب.

یاپونییانین آنا و ژال آویاشیرکتلری، هونک-کونقا مخصوص «جاتهای پاسیفیک» شیرکتی آرتیق طیاره‌لرینین ایران و عراقین هاوا مکانلاری ایله اوچمادیقلارینی قید ائدیبلر.

خاطیرلاداق کی، اوکراینایا مخصوص طیاره یانوارین ۸-ده تهران آئروپورتونون یاخینلیغین‌دا قزایا اوغراییب.

ایلکین معلوماتلارا گؤره، گؤیرته‌ده اولان ۱۶۷ سرنیشین و دوققوز هئیت عضوو هلاک اولوب.