اردبیل ویلایتینین خالخال شهرینه اوچ گون قار یاغماسی بحران‌لی وضعیته سبب اولوب.

آخار. آذ-این معلوماتینا گؤره، اردبیل ویلایتینین جنوب خالخال رایونون‌دا ۳ متردن چوخ قار یاغماسی نتیجه‌سین‌ده، شهرین بیر چوخ حیصه‌سین‌ده الکتریک و سو کسیلیب. همچینین آغیر قار یاغینتیلاری نتیجه‌سین‌ده بیر چوخ کندین یولو باغلانیب.

بئش گون سوره‌ن یاغینتیلار فئورالین ۱۳-ده کسیل‌سه ده، چووغون و کولک داوام ائدیب، کند و شهر یوللارینی آچماق اوچون سعیلر داوام ائدیر.

شهرده قار سوییه‌سی ۴ مئتره چاتدیغی و رایونون بعضی داغلیق اراضیلرین‌ده اوچقون اولدوغو حاق‌دا معلومات یاییلیب، لاکین باش وئره‌ن اوچقونلاردا هئچ بیر ایتکینین اولمادیغی دئییلیر.

خالخال مئری فیرودین بابایی شهرین سون دورومو باره‌ده معلومات وئره‌رک، شهر سوییه‌سین‌ده قارین یوکسکلیینین ۴ مئتردن چوخ اولدوغونو و رایونون بعضی داغ‌لیق اراضیلرین‌ده ده اوچقونلار باش وئردیینی، همچینین ۶۵ کندین یوللارینین باغلاندیغینی بیلدیریب.

او، همچینین شدت‌لی قار یاغینتیلاری و هاوانین سویوق‌لوغونا گؤره خالخال کندلرینین ایچمه‌لی سویو کسیلدیینی بیلدیریب.

اردبیل ویلایتینین یول و نقلیات ایداره‌سینین باش دیرئکتورونون وئردیی معلوماتا اساساً، ویلایت‌ده ۸۰۰ کندین یولو قار یاغینتیلاری نتیجه‌سین‌ده باغلانیب و ۲۳۱ کندین یوللارینی آچماق جهدلری داوام ائدیر.

خالخال شهرینین یئرلی منبع‌لرینین یایدیغی معلوماتا گؤره، داغ‌لیق بؤلگه‌لرده کندلرین کئچه‌ن هفته یاغان قاردان بری اون گون‌دن چوخ‌دور کی، یوللاری باغلی‌دیر. کند اهالی‌سینین شهره گلیب اؤز احتیاجلارینی آلماق‌دا چتین‌لیک چکدیی بیلدیریلیر.

خالخالین ایران پارلامئنتین‌ده‌کی میللت وکی‌لی بشیر خالیقی دئییب کی، "بوتون کندلره ائلئکتریک ائنئرژی‌سی وئریلجیینی بیلدیردیلر، اما بعضی کندلرده هله ده ائلئکتریک ائنئرژی‌سی یوخ‌دور، یعنی کندلرده چؤرک بیشیرمک اوچون بئله بیر ایمکان یوخ‌دور. بدبخت حادثه‌لری گؤرممییمیز اوچون بو کریتیک وضعیتلرین مومکون قدر تئز حل اولونماسی باره‌ده آجیل چاره قیلماق لازیم‌دیر."

یاغان قار نتیجه‌سین‌ده میدانا گلن بحران قارشی‌سین‌دا یئترسیز قالان دؤولت اورقانلارینین جهدلری وطنداشلار آراسین‌دا نارازیلیغا سبب اولوب.

یئرلی منبع‌لرین یاییملادیغی معلوماتا اساساً، بعضی بؤلگه‌لرده قار محاصره‌سین‌ده قالان وطنداشلارین قورتاریلماسینا ایمکانلارین یئترسیز اولماسی نتیجه‌سین‌ده جدی تدبیرلرین آلینمادیغی قئید اولونور.

اردبیل ویلایتینین مئتئورولوگییا ایداره‌سی خالخال رایونونو - ۲۵.۲ درجه ایله اؤلکه‌نین ان سویوق رایونو کیمی قئی‌ده آلیب.