رسمی ایروان اصلین‌ده بوتون ایستیقامتلرده روسییایا بیلدیریر کی، کالکتیو تهلوکسیزلیک مقاوله‌سی تشکیلاتی (سازمان پیمان امنیت دسته‌جمعی) فورماتی اونون اوچون قانع‌ائدیجی دئییل و تهلوکسیزلیینه ضمانت وئرمیر. پاشینیانین مطبوعات کنفرانسین‌دا وئردیی آچیقلامالار دا بونا دلالت ائدیر.

بو سؤزلری Axar.az-آ نیکول پاشینیانین دونن کئچیردیی مطبوعات کنفرانسین‌دا سسلندیردیی فیکیرلر حاقین‌دا دانیشان حقوق و اینسان حاقلاری اینستیتونون ایشچی‌سی، سیاسی شرح‌چی ریضوان حسینوو دئییب.

سیاسی شرح‌چی ارمنیستانین روسییانی باشقا حیمایه‌دارلارینین ماراقلاری اوچون ساتدیغینی بیلدیریب:

«عمومی سیاسی منظره‌یه نظر یئتیردییمیز زامان حقیقتا کالکتیو تهلوکسیزلیک مقاوله‌سی تشکیلاتینین ارمنیستانین تهلوکسیزلیینه ضمانت وئرمدیی گؤرونور. حتی اؤلکه اراضی‌سین‌ده یئرلشن روس حربی بازاسی دا ایروانا گووه‌ن وئرمیر. اونا گؤره، پاشینیان حکومتی آوروپا اتفاقینین آپاریجی عضولریندن اولان فرانسا ایله امکداشلیغا، اونونلا یاخینلاشماغا داها مئییللی‌دیر. دونن پاشینیانین مطبوعات کنفرانسی کئچیردیی زامان مدافعه ناظری سورن پاپیکیانین قبول ائتدیی آوروپا بیرلییی تکنیکی قیمتلندیرمه میسییاسی و اول گؤندریله‌ن هئیتلرین تشکیلی ده فرانسانین تشکیلات داخیلین‌ده آپاردیغی لابی‌چی‌لیک فعالیتینین نتیجه‌سی‌دیر. رسمی پاریس آوروپا بیرلییین‌دکی مؤوقعین‌دن ایستیفاده ائد‌رک بئله میسییالار واسطه‌سیله ایروان اوزرینده تأثیرینی داها دا آرتیرماق و گئنیشلندیرمک ایستییر. حاضردا پاشینیان مسکوایا اورادان اؤلکه‌سی اوچون خییرلی نسه گؤزلمدیی مئساژینی وئریر. واختیله عثمانلی دؤولتینده یوکسک وظیفه‌لر توتان ارمنیلر ان چتین دؤنمده اونو خاینلیک ائدیب روسییایا ساتدیلار. ایندی ده تاریخ تکرارلانیر - ارمنیستان باشقا حیمایه‌دارلارین منافعلری، ماراقلاری اوچون روسییانی ساتیر. بو، ارمنی خالقینین فاجعه‌سی‌دیر. اؤز حیمایه‌دارلارینی چتین مقام‌دا باشقا بیر حیمایه‌دارین بویوندوروغونا گیرمک اوچون ساتیرلار».

ریضوان حسینوو روسییانین ارمنیستانین آتدیغی آددیملاری جوابسیز قویمایاجاغینی وورغولاییب:

«نتیجه اولاراق روسییانین ارمنیستانا گئج-تئز جواب کیمی بؤیوک ضربه‌لر ووراجاغینی پروقنوزلاشدیرماق ممکن‌دور. یقین کی، پاشینیان حاکمیتینه هانسی‌سا مرکزلر معین ودعلر وئریب و اقتدار بو ایتکیلری گؤزه آلماغا حاضردیر. فورمالاشان وضعیت آذربایجانین بؤلگه‌ده مؤوقعینی داها دا گوجلندیره‌جک و فیکریمجه، دولتیمیز یارانان فورصت‌دن مثبت معنادا ایستیفاده ائدیب قاراباغلا باغلی پروبلملری ده تام آرادان قالدیراجاق. یاخین گله‌جکده ایسه ارمنیستانین تورکییه و آذربایجانین بیرلیینین اورتایا چیخاردیغی یئنی گئوسییاسی رئاللیغی قبول ائتمکدن باشقا چیخیش یولو قالمایاجاق».