اورمو گؤلونون قورودولماسینین اصل ماهیتی ایله باغلی بیر چوخ وئرسییالار وار. ایران بو لایحه‌نی ۲۰ ایلدیر کی، باشلادیب. نه قدر چالیشساق دا، بونون قارشی‌سینی آلا بیلممیشیک.

بو سؤزلری Axar.az-آ گونئی آذربایجان جمهوریت پارتییاسینین صدری، کیمیا مهندسی آراز آتاخان اورمو گؤلونون قصداً قوردولماسینین لیتیوم ماده‌سی ایله باغلی اولماسی فکرلرینه مناسبت بیلدیررکن دئییب.

اونون سؤزلرینه گؤره، رژیمین اورمو گؤلونو قصداً قوروتماسی ایله باغلی مختلف فکرلر وار:

«سون زمانلار گؤلون قصداً قورودولماسینی لیتیوم ماده‌سینین اوراداکی موجودلوغو ایله ده علاقه‌لندیریرلر. بونون دقیق‌لیی حاقدا نسه دئمک چتیندیر. لاکن حکومتین آتدیغی آددیملارا باخاندا بو فکر ده آغلاباتان گؤرونور. حتی دئییلیر کی، اورمو گؤلو تمامیله قوروسون دئیه گؤلون اوزرینده‌کی بولودلار قصداً داغیدیلیر. اطراف بؤلگه‌لره قار یاغسا دا، اورا هئچ یاغیش دا یاغمیر. بو وئرسییالارین هامیسی دوغرو اولا بیلر. لاکن ثبوتوموز یوخدور. سون بیر هفته‌دیر گؤلدن ماشینلارلا یوک داشینیر. ۱۸۰-ا یاخین ایری‌توتوملو ماشین اورمو گؤلوندن نسه داشیییر.

ایرانین اکولوگییا ناظرلیی ایسه آچیقلاماسیندا بیلدیریب کی، اونلار گؤلدن لیتیوم داشیمیرلار، قورویان اراضیلردن دوزو آپاریرلار کی، اطرافا سپه‌لنمه‌سین. لاکن دوزلارین هارا داشینماسی ایله باغلی سوالا آیدینلیق گتیریلمییب. اونا گؤره ده لیتیمون داشینماسی ایله باغلی احتماللار آرتیب و اهالی حساب ائدیر کی، گؤل بو سببدن قورودولور. حتی چینلیلرین اختیارینا وئریلدیی ده سؤیلنیلیر. بیلیریک کی، رژیم بو گؤلون قورودولماسیندا باشقا هدفلر گودور. سون بئش ایلدیر معدنلریمیز آمانسیزجاسینا تالان ائدیلیر. ایستر قیزیل، ایستر مس ثروتلریمیز فارس بؤلگه‌لرینه داشینیر. لاکن بو هانسی مقصدله حیاتا کئچیریلیر، بیلمیریک. یا آذربایجانین ثروتینی قصداً داغیدیرلار، یا دا حقیقتا لیتیوما گؤره بئله ائدیرلر. سواللاریمیز وار: بورا نیه قار یاغمیر و دوزو نیه یایدا داشیمیردیلار؟»

آراز آتاخانین سؤزلرینه گؤره، اورمو گؤلو اطرافیندا بیر چوخ قیمتلی یاتاقلار موجوددور:

«ارمو گؤلونون یاتاغیندا بیر چوخ معدن وار. اوردا موجود اولان ایستر کیمیوی، ایستر دیگر ماده‌لر چوخ قیمتلیدیر. بو یاتاقلاردا چوخلو لیتیوم اولدوغو دئییلیر. لیتیوم حاضردا الکتریک صنایع‌سینده، آوتوموبیلده، آیروکوسمیک صنایع‌ده چوخ استفاده اولونان ماده‌دیر. طب ساحه‌سینده ده گئنیش استفاده اولونور. حتی خرچنگ خسته‌لیینین معالجه‌سینده ده افکتلیدیر. کیمیا مهندیسی اولاراق لیتیومون دیرینی چوخ یاخشی بیلیرم».

اونون سؤزلرینه گؤره، اورمو گؤلونون قورودولماسی ایله باغلی اکولوژی فلاکت خبردارلیغی دا رژیمی سیاستیندن چکیندیرمیر:

«بؤیوک اکولوژی فلاکتله باغلی دفعه‌لرله خارجی اکسپرتلر ده اؤز ریلرینی وئریب. حتی بیرلشمیش ملتلر تشکیلاتی-نا کیمی مراجعتلریمیز اولوب. لاکن هامینین اکولوژی فلاکت کیمی قبول ائتدیی بو حادثه‌نی ایران رژیمی گؤرمزدن گلیر. بو دا اساس وئریر کی، رژیمین بو گؤلو قصداً قوروتماسی حاقیندا عمومی بیر فکر فورمالاشسین. ایرانین ان قوراقلیق بؤلگه‌لرینه عرب کؤرفزیندن میلیاردلارلا وسائط خرجلییب سو چکیلدیی حالدا، اورمو گؤلو اوچون هئچ بیر آددیم آتیلمیر. میللتین اعتراضلارینین دا بیر فایداسی اولمادی، عکسینه، اعتراض ائد‌نلری سیاسی آدلا توتاراق حبسه آتدیلار. ایکیلی سیاست گؤز اؤنونده‌دیر. مأمورلار گؤلون قوروماسی ایله باغلی اساسسیز فیکیرلر سسلندیریر، یالان وعدلر وئریرلر. ایندی ده لیتیوم مسئله‌سی اورتایا چیخدیقدان سونرا خالقین اعتراضلاری داها دا آرتیب. رژیم ده تضییقلرینی آرتیریر».

اونون سؤزلرینه گؤره، ایسته‌نیلن حالدا، گؤلون قصداً قورودولماسینین آرخاسیندا آذربایجانلا باغلی مکرلی سیاست دایانیب:

«اورمو گؤلونون قوردولماسیندان سونرا بو بؤلگه‌ده یاشایان تورک اهالی کؤچمه‌یه مجبور قالاجاق. ولایتینین سؤزلری ایله دئسک، ایران حکومتی آنلاییر کی، گئج-تئز گونئی آذربایجان آیریلاجاق و اورا سرمایا قویماق لازم دئییل. بونو مختلف ایرانلی اکسپرتلر ده دیله گتیریبلر. آذربایجانا قارشی بو سببدن دشمنچی‌لیک سیاستی یورودورلر و اونلارین سیراسیندا اورمو گؤلونون بیله‌رکدن قورودولماسی و تالانماسی پلانی دایانیر. ائله ۱۵ میلیون آذربایجان تورکونو همین بؤلگه‌دن کؤچورتمک ده لایحه‌نین بیر حصه‌سیدیر».