ایران‌دا پارلامئنت سئچکیلرینده اشتراک ائد‌ن نامیزدلر حاکمیته باغلی اینسانلاردیر. یالنیز نگهبان شوراسینین سوزگجیندن کئچه‌ن اینسانلارین نامیزد کیمی اشتراکینا اجازه وئریلیر. همین نامیزدلر ایسه خالقین دئییل، حاکمیتین یانیندادیر.

بو سؤزلری Axar.az-آ گونئی‌لی میللی فعال سورگون گونش ایران‌دا مارت آیین‌دا کئچیریله‌جک پارلامنت سئچکیلری حاقین‌دا دانیشارکه‌ن دئییب.

گونش گونئی آذربایجان تورکلرینین اکثریتینین بو سئچکیلرده اشتراک ائتمیجیینی بیلدیریب:

«بیز سئچکیلری بایکوت ائدیریک. خالقیمیزین چوخو سئچکیلره قاتیلمایاجاق. ایندیکی واخت‌دا سئچکیلرده اشتراک ائتمییمیز اورمییا گؤلونون قورودولماسینا، اکولوژی فلاکته، اقتصادی پروبلملره سس وئرمک اولاردی».

سورگون گونش حساب ائدیر کی، بایکوت قراری بؤیوک معنادا سئچکیلرین نتیجه‌سینه تأثیر ائتمه‌سه ده، میللی حرکات اوچون مثبت تأثیر بوراخاجاق:

«داخیل‌ده حاکمیتین چیرکین سیماسی آچیلدیقجا میللتیمیز ده اونلاردان اوز دؤندریر. حتی دئیردیم کی، گونئی آذربایجان‌دا میللتیمیزین بؤیوک اکثریتی داها سئچکیلرده اؤز سسینی کیمه‌سه وئرمک ایستمیر. هم نامیزدلره، هم ده پارلامنت‌ده قبول ائدیله‌جک قرارلارا گووه‌ن ایتیب. چونکی مجلیس خالقین سسینی تمثیل ائتمیر. بیز بونا اورمییا گؤلوندن سونرا بیر داها امین اولدوق. حکومتین قرارسیزلیغی آذربایجان میللتینی یئنی‌دن دوشونمه‌یه وادار ائتدی. اون ایللردیر اعتراض ائدیریک، لاکین مثبت بیر نتیجه الده اولونماییب. بیلیریک کی، حاکمیت بیزه ایستدییمیزی وئرمه‌یه‌جک. اودور کی، میللی فعاللاریمیز بونا اعتراض اولاراق سئچکیلری بایکوت ائدیر. حاکمیت بیزیم بایکوت قراریمیزا هر هانسیسا سیاسی دون گئییندیریب، اؤز خییرینه چیخاجاق. بئله اولاجاغینا شبهه‌میز یوخدور. اما ان آزیندان حاکمیتده بیر سوال دا یاراناجاق کی، اینسانلار نیه سئچکییه قاتیلماق ایستمیر؟ اومید ائدیریک کی، بونون بیر تأثیری اولاجاق».

اونون سؤزلرینه گؤره، آرتیق حاکمیت‌ده اونلارین بایکوت قراری ناراحاتلیق یارادیب و هر واسطه ایله خالقین سئچکیلره گئتمه‌سینی ایستییرلر:

«ایندی ده میللتی هده‌له‌مه‌یه باشلاییبلار. یوکسک روتبه‌لی مأمورلار سئچکیلره قاتیلمایانلاری جزالاندیراجاقلارینی دئییرلر. مختلیف یوللارلا خبردارلیق گؤندریب، بایکوت قرارین‌دان واز کئچمه‌یه چاغیریرلار. بیز ایسه قراریمیزدان دؤنمک نیتینده دئیی‌لیک. منه بیر نئچه دفعه دولایی‌سی ایله خبر چاتدیریبلار کی، بایکوت چاغیریشلاریندان ایمتینا ائدیم و خالقی دا سئچکیلرده اشتراکا ایناندیریم. لاکین جوابیم بیرمعنالی شکیلده بئله اولدو کی، غربی آذربایجاندا کورد–تورک پروبلمی و بیزی ناراحات ائد‌ن اونلارلا مسئله حل اولونمایینجا، هئچ بیر سئچکی‌ده اشتراک ائتمه‌یه‌جه‌م. نه قدر کی، سسیمیزی ائشیتمه‌ییبلر، سئچکیلره گئتمیجییک و نتیجه‌لری ده بیزیم اوچون ماراقلی دئییل».