اسلام انقلابی کئشیکچیلری کورپوسو (سپاه) ۱۹۷۹-جو ایلده اسلام انقلابینی قوروماق مقصدیله اردویا پارالل ایستروکتور کیمی یارادیلسا دا، اوستوندن اونیللیکلر کئچدیکدن سونرا هدفلرینی بؤیودوب. بو قوروم هم ایران داخلینده اصلاحات طلب ائد‌ن انسانلارا و گروپلارا قارشی مبارزه آپاریر، هم خارجده‌کی طرفداش گروپلارا سلاح و سورسات گؤندریر، هم کورپوسون عضولرینی قونشو اؤلکه‌لرده‌کی دؤیوشلره یوللاییر، هم مختلف اؤلکه‌لرده تأثیر گروپلاری فورمالاشدیریر، هم ده هانسی اؤلکه‌یه ضربه ائندیرمک باره‌ده مستقل قرار وئریر. بونونلا سپاه دولت‌اوستو قوروما چئوریلیب.

Axar.az خبر وئریر کی، بو سؤزلری پولیتولوق ائلخان شاهین‌اوغلو قید ائدیب.

او بیلدیریب کی، ایران پرزیدنتی و خارجی ایشلر ناظیری سپاه کماندانلیغینین قرارینا قاریشا بیلمیر:

«بیر نئچه گون اول قونشو عراقا و پاکیستانا ضربه ائندیرمک قرارینی دا سپاه کماندانلغی وئریب. آنجاق بو دفعه محکم ایلیشیبلر. عراقدان فرقلی اولاراق، پاکیستان ضعیف اؤلکه دئییل، اونا گؤره ده درحال ایرانا عکس-ضربه‌لر ائندیردی. تهران وضعیتدن چیخیش یولو آختاریر. نووه دولتی اولان پاکیستانلا محاربه ریسکی ایران اوچون فلاکت سسناریلریندن بیرینه چئوریله بیلر».

قید ائدک کی، ۱۶ یانواردا سپاه پاکیستان اراضی‌سینده ترورچو سایدیغی "جیش العدل" گروپلاشماسینی راکتله ووروب، نتیجه‌ده ایکی آزیاشلی هلاک اولوب. پاکیستان بو ضربه‌یه کسکین رئاکسییا وئریب، ایران سفیرینی گئری چاغیریب، همچینین تهرانا بوتون رسمی سفرلری تاخیره سالیب.

بو گون ایسه پاکیستان ایرانین سیستان و بلوچستان اراضی‌سینده ترورچو یووالارینا جواب ضربه‌سی ائندیریب. ایرانین معلوماتینا گؤره، ایران وطنداشی اولمایان ۷ نفر (داها سونرا اؤلنلرین ۹ نفر اولدوغو بیلدیریلدی) اؤلوب.