ارمنیستان باش ناظیرینین آچیقلاماسی آذربایجانلا ارمنیستان آراسیندا صلح و دولتلرآراسی مناسبتلرین قورولماسی حاقیندا ایکی‌طرفلی سازش لایحه‌سی اوزره پروسسدن فکر یاییندیرماق مقصدی داشییر.

Axar.az خبر وئریر کی، بونو آذربایجان خارجی ایشلر ناظیرلیینین مطبوعات کاتبی آیخان حاجیزاده-نین ارمنیستانین باش ناظیرینین اردو گونونده سسلندیردیی فکرلره جوابیندا دئییب.

"آذربایجان طرفینین سؤزوگئدن سازش لایحه‌سی اوزره مذاکره‌لر باشلاناندان اعتباراً ارمنیستان طرفینین اؤز کونستیتوسییاسیندا، قانون‌وئریجیلیک ارگانینین بیر سیرا قرارلاریندا، ائلجه ده ۴۴ گونلوک وطن محاربه‌سیندن سونرا مختلف بین‌الخالق محکمه‌لره مراجعتلرینده، رسمی یازیشمالاریندا و بین‌الخالق تشکیلاتلار چرچیوه‌سینده یایدیقلاری مکتوبلاریندا آذربایجانین اراضی بوتؤولویو و سووئرنلیینه قارشی داوام ائد‌ن ادعالارا سون قویماغا چاغیریش ائتمه‌سینه باخمایاراق، ایندییه قدر بو استقامتده ارمنیستان طرفیندن هر هانسی بیر عملی آددیم آتیلماییب. بونونلا علاقه‌دار، ارمنیستان طرفینین بو استقامتده تدبیرلر گؤرمک عوضینه، هئچ بیر پراکتیکی اهمیتی اولمایان تکلیفلر سسلندیرمه‌سی آنلاشیلمازلیق یارادیر و قبول‌ائدیلمزدیر"، - حاجیزاده بیلدیریب.

او قید ائدیب کی، ارمنیستانین ۳۰ ایل عرضینده محض طرف اولدوغو اراضی بوتؤولویوموزون و سووئرنلییمیزین تانیندیغی بین‌الخالق مقاوله‌لر و سلاحلارا نظارت مخانیزملری چرچیوه‌سینده عهده‌لیکلرینی کوبود شکلده پوزدوغو، آذربایجانا قارشی تجاوز تؤرتدیی، اراضیلریمیزین اشغالی مدتینده اکثر حربی تکنیکاسینی و سلاح سیستملرینی اؤلکه‌میزین اراضی‌سینده غیر قانونی یئرلشدیرمکله بین‌الخالق سلاحلارا نظارت مخانیزملریندن گیزلتدیی هر کسه معلومدور:

"قید ائدیلنلری، هابئله باش ناظیر پاشینیانین دا بیلدیردیی کیمی، اؤلکه‌سینین جدی حربیلشمه سیاستی آپاردیغینی، سون ایللرده بیر نئچه میلیارد دلارلیق سلاح تداروکو مقاوله‌لری امضالاندیغینی، حربی صنایعنی انکشاف ائتدیردیینی نظره آلاراق، ارمنیستانین صلح پروسسینه جدی یاناشدیغینی ادعا ائتمه‌سی سیاسی مانیپولیاسییادیر. بو کیمی غرضلی بیاناتلار بؤلگه‌نین بین‌الخالق حقوقون نورما و پرینسیپلرینه حرمت اساسیندا گلجک انکشافی و ترقی‌سینه مانع‌چیلیکدیر.

آذربایجان اؤز نوبه‌سینده صلح و قوروجولوق سعیلرینی داوام ائتدیرجک و ارمنیستاندان دا سؤزده دئییل، عملده آدکوات آددیملارین آتیلماسینی گؤزلییر".

قید ائدک کی، یانوارین ۲۸-ده ارمنیستان باش ناظیری نیکول پاشینیان اردو گونو ایله علاقه‌دار چیخیشی زمانی آذربایجانا قارشی‌لیقلی سلاحلارا نظارت مخانیزمی، هابئله هجوم ائتممک حاقیندا پاکت امضالاماغی تکلیف ائتدیکلرینی بیلدیریب.