ارمنیستانین باش ناظیری نیکول پاشینیانین بؤیوک بریتانییانین «تلگراف» نشرینه مصاحبه‌سی آذربایجاندا دا گئنیش مذاکره اولونور. پاشینیان یئنه مختلف مقاوله‌لردن دانیشیر و گویا همین مقاوله‌لر اساسیندا آذربایجانلا ارمنیستان بیر-بیرینین اراضی بوتؤولویونو تانییب.

Axar.az خبر وئریر کی، بو سؤزلری پولیتولوق ائلخان شاهین‌اوغلو قید ائدیب.

اونون سؤزلرینه گؤره، پاشینیانین نظرده توتدوغو همین مقاوله‌لر اساس گؤتورولسیدی، ارمنیستان آذربایجان تورپاقلارینی ۳۰ ایل عرضینده اشغال آلتیندا ساخلامامیلییدی:

«آذربایجانین تمثالیندا بین‌الخالق حقوق و مقاوله‌لر ایشلمه‌دی، ایندی ایسه پاشینیان ارمنیستانین تمثالیندا بین‌الخالق حقوقون و مقاوله‌لرین ایشلمه‌سینی ایستییر. گئجدیر.

پاشینیان مصاحبه‌سینده اؤلکه‌سینین ناتو عضوو اولمایاجاغینی دا دئییب. ارمنیستان تشکیلاتا عضو اولا بیلمه‌یجکسه، نیه عضولویو قارشیسینا هدف قویمالیدیر؟ بو معنادا پاشینیان گورجوستان و اوکراینا تورپاقلارینین اشغالیندان درس آلیب. اونلار دا ایللر اؤنجه ناتو عضولویونو قارشیلارینا هدف قویدولار و... اؤزلری هدف اولدولار. آنجاق پاشینیانین چتین‌لیی اوندادیر کی، «روسیا آرتیق متفقیمیز دئییل» دئمکله برابر، غربدن گرکن تهلوکه‌سیزلیک تأمیناتی آلمادیغینا دا اشاره ووروب. تصادفی دئییل کی، انگلیس ژورنالیست پاشینیانین بو دورومونو نظره آلاراق اونا بئله بیر سوال دا وئریب: «آذربایجانلا اوچونجو محاربه‌دن قورخورسونوزمو؟» او، بؤلگه‌ده گوج نسبتینین ارمنیستانین ضررینه اولدوغو آنلادیغینا گؤره جوابدا سوالا دخلی اولمایان سؤزلر ایشلدیب. پاشینیان اونو دا دئییب کی، گویا آذربایجانلا ارمنیستان بیر-بیرینه قارشی گوجدن استفاده ائتمدیکلرینه دائر سند امضالاییب. البته، آذربایجان ارمنیستانلا یئنی محاربه ایستمیر، آنجاق ۸ کندینی گئری قایتارماق تشببوسلریندن ده امتنا ائتمه‌یجک».