آذربایجان و تورکیه‌ده هر سئچکی‌دن سونرا ایلک قارشی‌لیقلی رسمی سفرلرین آنکارا و باکییا ائدیلمه‌سی عنعنه حالینی آلیب. آذربایجان پرزیدنتی ایلهام علیئوین سئچکی‌دن سونرا تورکیه‌یه بودفعه‌کی سفری ده اهمیتلی ایدی.

Axar.az خبر وئریر کی، بو باره‌ده پولیتولوق ائلخان شاهین‌اوغلو قید ائدیب.

او، سفرین اهمیتینین آشاغی‌داکیلار اولدوغونو بیلدیریب:

«بیرینجی‌سی، لیدرلر ایکی اؤلکه آراسیندا تجارت مبادله‌سینین حجمینین ۱۵ میلیارد دلارا چاتدیریلماسینین واجب اولدوغونو بیر داها بیلدیردیلر. بو هم ده گؤروشده اشتراک ائد‌ن ناظیرلره تاپشیریق ایدی کی، تجارت حجمینین آرتیریلماسی اوچون ضروری تدبیرلر گؤرسونلر. بوندان باشقا آنکاراداکی گؤروشده ناخچیوان اوچون ایکی واجب لایحه‌نین – قارس-ناخچیوان دمیر یولونون و ایغدیر-ناخچیوان گاز بورو خطینین رئاللاشما مرحله‌سینده اولدوغو خاطیرلادیلدی.

ایکینجی‌سی، آذربایجان-تورکیه اونیورسیتتینین یارادیلماسینین سرعتلندیریلمه‌سی واجب‌لیی وورغولاندی. فرانسا ایله مناسبتلریمیز گرگین اولدوغو حالدا باکی‌دا فرانسا-آذربایجان اونیورسیتتی فعالیت گؤستردیی حالدا پایتاختیمیزدا قارداش و متفق تورکیه آدینا اونیورسیتتین یارادیلماسی ضروریدیر.

اوچونجوسو، لیدرلر حربی تکنیکی امکداشلیغین گئنیشلندیریلمه‌سی باره‌ده فکرلر سسلندیردیلر. بو ساحه‌ده اورتاق استحصالین فعالیته باشلاماسینا آز قالیب. ایلهام علیئو آنکارادا «آذربایجان اردوسو تورکیه اردوسونون کیچیک مدلی حالیندا انکشاف ائدیر» جمله‌سینی تکرارلاماغی دا اونوتمادی.

دؤردونجوسو، ایلهام علیئو تورک دولتلری تشکیلاتینین ایول آیندا شوشادا کئچیریله‌جک غیر-رسمی زیروه توپلانتی‌سینا کوزئی کیبریسین دا مشاهده‌چی قسمینده دعوت اولوناجاغینی بیلدیردی. ایلهام علیئو تورکیه‌لی همکاری رجب طیب اردوغانین کوزئی کیبریسین تورک عائله‌سینده یئر آلماسی سیاستینه دستیینی آرتیریب. آنجاق بو آزدیر، مرکزی آسیا اؤلکه‌لرینین ده کیبریسا دستکلرینین آرتیریلماسینا احتیاج وار.

ایلهام علیئوین آنکارادا سؤیلدیی کیمی، ایکی اؤلکه آراسیندا متفق‌لیک کئچمیش ایللرده ده موجود اولوب، ایکینجی قاراباغ محاربه‌سی و اوندان سونراکی دؤورده متفق‌لیک داها اوست سویه‌یه چاتیب. بونو بؤلگه‌ده مختلف ماراقلاری اولان دولتلر ده قبول ائتمک مجبوریتینددیرلر. همین دولتلر آنلاییرلار کی، آذربایجانا تهلوکه یاراداجاقلاری حالدا قارشیلاریندا تورکیه‌نی ده گؤرجکلر. بو، آذربایجانین تهلوکه‌سیزلیینین گوجلندیریلمه‌سی باخیمیندان اهمیتلی‌دیر».