ارمنیستان باش ناظری نیکول پاشینیان تاووش بؤلگه‌سینده یئرلی ساکینلرله گؤروشده آذربایجانین طلب ائتدیی ۴ کندین گئری قایتاریلماسی ضرورتینی محاربه تهلوکسیله اونا گؤره ایضاح ائدیب کی، بونونلا باغلی باکی‌دان خبردارلیق آلیب. مئساژین ماهیتی بو اولوب کی، یاخین گونلرده ۴ کند قایتاریلماسا، آذربایجان اوردوسو همین کندلره داخیل اولاجاق. همین مئساژی بو آیین ۷-ده آذربایجان باش ناظرینین معاوینی شاهین مصطفی‌یئو ارمنیستان باش ناظرینین معاوینی مگئر گریگوریانا، او دا اؤز نوبه‌سین‌ده رهبری نیکول پاشینیانا چاتدیریب. بونون قارشیلیغین‌دا پاشینیان بو مسئله‌نی قیسا مدت‌ده حل ائدجیینی وعد وئریب.

Axar.az خبر وئریر کی، بو سؤزلری پولیتولوگ الخان شاهینوغلو قئید ائدیب.

او بیلدیریب کی، نیکول پاشینیان ۴ کندی آذربایجانا قایتارماسی قارشیلیغیندا رسمی باکییا اؤز تکلیفینی گؤندریب: «سرحدین دلیمیتاسییاسینا ارمنیستان طرفدن باغانیس، آذربایجان طرفدن باغانیس آیریم کندی بؤلگه‌سیندن باشلایاق»:

«پاشینیانین بو تکلفینین آرخاسیندا نه دایانیر؟ بیرینجی‌سی، نیکول پاشینیان همین بؤلگه‌ده ۴ کندین آذربایجانا قایتاریلماسینی تعمین ائتدیکدن سونرا قازاخا عایید دیگر ۳ کند موضوع‌سونو «قاپاتماق» ایستییر. چونکی سرحدین همین بؤلگه‌سینین دلیمیتاسییاسی راضیلاشدیریلارسا، آذربایجانا مخصوص و یئرده قالان ۳ کندین گئری قایتاریلماسی ممکن اولمایاجاق. ایکینجی‌سی، نیکول پاشینیان اومید ائدیر کی، ۴ کندی آذربایجانا قایتاردیقدان و سرحدین همین حیصه‌سی معین‌لشندن سونرا او سرحدین جنوب حیصه‌سین‌ده‌کی ایتیردیی یوکسکلیکلری دلیتیماسییا یولو ایله گئری قایتارا بیله‌جک.

رسمی باکینین نیکول پاشینیانین هر ایکی تکلیفینه راضیلاشاجاغی احتمالی آزدیر. باکی ایروان‌دان بیرینجی مرحله‌ده صلح و یا چرچیوه سازیشینین امضالانماسینی طلب ائدیر. صلح الده ائدیلدیکدن سونرا مختلیف موضوع‌لارلا باغلی دانیشیقلاری داوام ائتدیرمک اولار. ۴ کندین گئری قایتاریلماسی چرچیوه سازیشینین امضالانماسی پرسپکتیوینی گوجلندیره‌جک».