آنا صحیفه سیاست |
ارمنیستان باش ناظیری نیکول پاشینیانین آذربایجانا مخصوص ۴ کندین گئری قایتاریلماسی رئاللیغینی آنلاماسینین سببلریندن بیری نوبتی محاربهده مغلوب اولاجاغینی آنلاماسیدیرسا، دیگر سببی ایکینجی قاراباغ محاربهسیندن سونرا اردوداکی اصلاحاتلاری سرعتلندیره بیلمهمهسیدیر. ارمنیستان حکومتی اردو اصلاحاتلارینین عمومی کنسپسییاسینی هله فورمالاشدیرا بیلمهییب. ارمنیستان اردوسو یئرینده سایارکهن، آذربایجان اردوسو مدرنلشیر، سلاحلی قوهلرین یئنی قوشون نوعلری فورمالاشیر، تورکیه استاندارتلاری منیمسنیلیر و آلینان یئنی حربی تکنیکا ایله زنگینلشیر.
Axar.az خبر وئریر کی، بو بارهده «اطلس» آراشدیرمالار مرکزینین آنالیزینده بیلدیریلیب.
قید ائدیلیب کی، ارمنیستانین حربی خرجلری ۴.۱ فایزدن ۵.۵ فایزه قدر آرتیریلیب:
«اگر ارمنیستان ۲۰۲۲-جی ایلده حربی خرجلره بودجهدن ۷۹۵ میلیون دلار آییرمیشدیسا، ۲۰۲۳-جو ایلده بو رقم ۱ میلیارد ۳۳۰ میلیون دلارا چاتیب. آنجاق ارمنی اکسپرتلری آرتان رقمین اردونون احتیاجلارینی اؤدمدیی قناعتینددیرلر. همین اکسپرتلر حساب ائدیرلر کی، ارمنیستان حکومتینین فرانسا و هیندیستاندان آلدیغی سلاحلار اردونون حربی تکنیکایا اولان احتیاجینین چوخ جزعی حصهسینی تامین ائدیر و آلینان حربی تکنیکا عمومی کنسپسییانین ترکیب حصهسی دئییل. یعنی فرانسا و هیندیستان ارمنیستانا نه تکلیف ائدیرلرسه، ایروان اونلاری آلیر. باشقا سؤزله، ارمنیستان ایستدیینی دئییل، تکلیف ائدیلهنی آلماق مجبوریتیندهدیر. حالبوکی ارمنیستان اردوسو اوچون مختلف دولتلردن آلینان عینی آدلی حربی تکنیکانین بیر-بیری ایله اینتگراسییاسی دا جدی سواللار دوغورور.
باش ناظیر نیکول پاشینیان موجود دورومو دییشمک اقتداریندا دئییل، او زمانلا مبارزه آپاریر. پاشینیان نوبتی محاربهنین ارمنیستان اردوسونداکی چاتیشمازلیقلاری بیر داها اوزه چیخاراجاغی قناعتیندهدیر. پاشینیان ایکینجی قاراباغ محاربهسیندهکی مغلوبیتی ارمنیستانین کئچمیش رهبرلرینین یاریتماز فعالیتی ایله علاقهلندیرمیشدی. پاشینیان محض کئچمیش پرزیدنتلر روبرت کؤچریانین و سرژ سرکیسیانین اردو اوچون گرکلی حربی تکنیکا آلمادیغینی، آلینانلارین ایسه ایشه یارامادیغینی وورغولامیشدی. محاربهدن ۳ ایل یاریم زمان کئچیب و پاشینیان بوندان سونرا اردوداکی وضعیته گؤره آرتیق کئچمیش رهبرلیی اتهام ائده بیلمز. ارمنیستان روسیادان سلاح و حربی تکنیکا آلیشینی خیلی درجهده آزالدیب. پاشینیان سلاحی و حربی تکنیکانی روسیانین عوضینه غرب اؤلکهلریندن آلاجاغینا امید ائدیردی. آنجاق فرانسانین خارجینده غرب اؤلکهلریندن ارمنیستانا هله کی، سلاح و حربی تکنیکا ساتان یوخدور. دیگر طرفدن ارمنیستان حکومتی حربی خرجلری آرتیرارکهن سوسیال خرجلری آزالتماق مجبوریتینده قالاجاق. بو ایسه ارمنیستاندا ناراضیلیغین آرتماسینا سبب اولاجاق. اونا گؤره ده بو وضعیتدن یگانه چیخیش یولو ایروانین باکی ایله دیالوگو گئنیشلهندیرمهسی و راضیلاشمالارین سایینی آرتیرماسیدیر. ارمنیستانین آذربایجانلا صلح الده ائتمهسی قونشو اؤلکهنین اونسوز دا کاساد اولان بودجهسینین حربی خرجلرینی آرتیرماقدان خلاص ائده بیلر».
تاریخ
2024.04.23 / 23:03
|
مولف
Axar.az
|