ایرانین عالی دینی لیدری علی خامنه‌اینین مرحوم پرزیدنت ابراهیم رئیسینین وداع مراسمینده اشتراک ائتمک اوچون بو گون تهران‌دا اولان ارمنیستانین باش ناظیری نیکول پاشینیانلا گؤروشو زمانی سؤیلدیی بعضی فکرلرین آلت قاتی وار. «مرحوم پرزیدنتیمیزین ارمنیستانین سرحد پروبلملرینه بؤیوک حساسلیغی وار ایدی» دئیه‌ن عالی دینی لیدر بو حساسلیغین و دقتین بوندان سونرا دا نظره آلیناجاغینی بیلدیریب.

Axar.az خبر وئریر کی، بو سؤزلری پولیتولوق ائلخان شاهین‌اوغلو قید ائدیب.

«بؤیوک احتماللا عالی دینی لیدر بونو دئدیکده یا آذربایجانین ارمنیستانلا شرطی سرحدده استراتژی یوکسکلره نظارت ائتمه‌سینی، یا دا زنگزور دهلیزینی نظرده توتوب. خامنه‌ای پاشینیانی آرخایین ائتمک ایسته‌ییب کی، ایرانین گله‌جک پرزیدنتی ده مرحوم ابراهیم رئیسی کیمی ارمنیستانین «سرحد پروبلمینه حساس یاناشاجاق». ایرانین بو «حساسلیغینین» هئچ بیر اهمیتی یوخ‌دور، ارمنیستانلا آذربایجان آراسیندا سرحدلر معیینلشیر، دهلیزله باغلی دا دانلیشیقلار داوام ائدیر و تهران بو پروسسه قاریشا بیلمیر»، - پولیتولوق بیلدیریب.

اونون فکرینجه، خامنه‌اینین «ایران و ارمنیستان آراسیندا مناسبتلرین علیه‌دارلاری وار، اونا گؤره ده هر ایکی اؤلکه ایله باغلی مسئله‌لر بؤیوک دقتله حل اولونمالی‌دیر» جمله‌سی ایسه ائله نیکول پاشینیانین اؤزونه مساژدیر:

«خامنه‌ای «مناسبتلرین علیه‌دارلاری وار» دئدیکده بیرینجی نوبه‌ده آمریکا بیرلشمیش اشتاتلارینی نظرده توتوب. ارمنیستانین باش ناظیری ایرانلا مناسبتلری انکشاف ائتدیرمکله یاناشی، تهرانین «بؤیوک شیطان» آدلاندیردیغی همین آمریکا-یلا سیاسی و حربی موضوع‌لاردا دیالوگو گئنیشلندیریب. بو سیاست تهرانین و قمون خوشونا گلمیر. اونا گؤره ده خامنه‌ای «آرامیزداکی مسئله‌لر دقتله حل اولونمالی‌دیر» ایفاده‌سی ایله ارمنیستانین باش ناظیرینی خبردار ائدیب».