پزشکیانین تبریزده بئله قارشیلانماسی گؤزله‌نیله‌ن ایدی. او، جمعیت‌ده آذربایجانلی اولاراق قبول ائدیلیب. بونون سئچکیلرده نه درجه‌ده اونون خئییرینه اولاجاغینی ایسه دئمک چتیندیر.

بونو Axar.az-آ تانینمیش گونئی‌لی یازار و آراشدیرماچی محمد رحمانیفر پزشکیانین تبریز سفرینین سئچکیلره تأثیرینی شرح ائدرکه‌ن دئییب.

ایران‌دا اینسانلارین ساندیق باشینا گئدیب-گئتمه‌مه‌لرینین اهمیت داشیمادیغینی وورغولایان آراشدیرماچی بیلدیریب کی، سئچکیلرده خامنه‌ای و اونون اطرافینین معینلشدیردیی شخص غالیب گله‌جک:

«سئچکیلرین تالعی ایله باغلی ۳ احتمالیم وار. دونیایا میدان اوخوماق ایسته‌سه‌لر جلیلی، خاریجی و داخیلی سیاست‌ده جزعی یومشالمالارا گئتمک ایسته‌سه‌لر پزشکیان، نیسبتاً اورتا وضعیت یارادیب، رئیسی سیاسی خطینی داوام ائتدیرمک ایسته‌سه‌لر قالیباف پرزیدنت وظیفه‌سینه گتیریله‌جک. حاضردا اوچونون ده شانسی وار. سون دورلر گونئی آذربایجان‌لی اولاراق پزشکیانین نفوذو داها دا آرتیب. بو باخیمدان گونئی‌لیلری سوسدورماق اوچون آذربایجان‌لی نامیزدی پرزیدنت ائده بیلرلر».

آمریکادا دونالد ترامپین یئنی‌دن حاکمیته گلمه احتمالینین ایران‌داکی سئچکیلره بلاواسطه تأثیر ائتدیینی دئیه‌ن رحمانیفر احتمال ائدیر کی، اؤلکه‌نین موجود دورومونا گؤره جلیلی‌نین شانسی آشاغی دوشور:

«قالیباف و پزشکیان آراسیندا ایسه منیم باخیش بوجاغیمدان سئچیم ائلمک چتیندیر. هر ایکی‌سینین سیاسی خطین‌ده بنزرلیک وار. جلیلی طرزینین بیر طرفینده، پزشکیان دیگر طرفینده‌دیرسه، قالیباف اونلارین اورتاسیندا دایانیر. سئچکیلره قاتیلانلارین سایینین آز اولاجاغینی دا نظره آلساق، پزشکیان اوچون وضعیت قناعتبخش اولمور. اونون قالیب گلمه‌سی اوچون، گرک، ساندیق باشیندا آذربایجانلی نامیزدین طرفدارلاری آنشلاق یاراتسین، رژیم طرفدارلارینین ال-قولونو باغلاسین. یعنی رژیم دئسه کی، سن سئچیلمه‌می‌سه‌ن، بو، توپلومدا سرت رئاکسییایا سبب اولسون. ائله بیر وضعیت یاراناجاغینی ایسه پروگنوزلاشدیرمیرام».