ابراهیم رئیسینین اؤلوموندن سونرا ایران‌دا کئچیریله‌جک نوبدنکنار پرزیدنت سئچکیلری بو اؤلکه‌ده رژیمین ماهیتینده بؤیوک دییشیکلییه سبب اولماسا دا، داخلی سیاسی مبارزه فونوندا ماراقلی‌دیر.

سئچکی‌ده ۶ نامزدین مبارزه آپاراجاغی گؤزلنیلیردی: اصلاحات‌چی قانادی تمثیل ائد‌ن کئچمیش صحیه ناظیری مسعود پزشکیان و محافظه‌کار قانادی تمثیل ائد‌ن پارلامنتین صدری محمد باقر قالیباف، تهران مری علیرضا زکانی، عالی رهبرین اؤلکه‌نین تهلوکه‌سیزلیک شوراسیندا نماینده‌سی سید جلیلی، داخلی ایشلر و عدلیه ناظیری اولموش مصطفی پورمحمدی، ویتسئ-پرزیدنتی سید امیر حسین قاضی‌زاده هاشمی؛

سئچکییه ایکی گون قالمیش قاضی‌زاده قالیبافین خیرینه نامزدلیینی گئری گؤتوردو، داها سونرا زکانی دا عینی آددیمی آتدی. بو، یاریشدا قالیبافین محافظه‌کار نامزدلر آراسیندا ایر‌لییه چیخماسینا شرایط یارادیر. لاکن پزشکیان سئچیجیلر آراسیندا نفوذو و بوتون رای سورغولاریندا اؤنده اولماسی اوزرینده دایانیلماسی واجب اولان مقام‌دیر.

و اساس سوال اصلاحات‌چی پزشکیانین سئچکییه نیه بوراخیلماسیدیر.

رئیسینین اؤلوموندن سونرا دینی لیدر خامنه‌اینین ده ایستیینه اویغون اولاراق، محافظه‌کار سیاسی خطین داوام ائدجیی، بو باخیم‌دان، اساس مبارزه‌نین ده بو قانادا مخصوص نامزدلر آراسین‌دا اولاجاغی آچیق گؤرونوردو. هرچند پزشکیانین نامزدلیینین قیده آلینماسی بو گؤزلنتیلری آرخا پلانا کئچیردی. پزشکیان محافظه‌کار رژیم اوچون تکجه اصلاحات‌چی قانادی تمثیل ائتمه‌سی ایله یوخ، هم ده بوتون اتنیک گروپلار آراسیندا نفوذو ایله پروبلملی نامزددیر: او، آنا طرفدن کورد اولسا دا، آذربایجانلی کیمی قبول ائدیلیر و هم کوردلرین، هم آذربایجان‌لیلارین، هم ده دیگر اتنیک گروپلارین دستیینی الده ائدیر؛

و بللی‌دیر کی، بوتون اتنیکلرین بیرلشمه‌سی ایران رژیمی اوچون قورخولو پرسپکتیو وعد ائدیر. بو پرسپکتیو فونوندا اصلاحات‌چی پزشکیانین سئچکی یاریشینا بوراخیلماسینین ایکی ممکون سببی اولا بیلر:

بیرینجی‌سی، رئیسینین یئری اوغروندا محافظه‌کار قاناد آراسیندا یاشانان مبارزه‌نین دایاندیریلماسی، اونلارین اصلاحات‌چییا قارشی بیرلشمه‌سیدیر: بو سسناری تام باش توتماسا دا، ایکی نامزدین قالیبافین خیرینه گئری چکیلمه‌سی ایله معین نتیجه الده اولوندو؛

ایکینجی‌سی، اصلاحات‌چی نامزدین حاکمیته گتیریلمه‌سی و اؤلکه‌ده‌کی بوتون پروبلملرین اونون اوزرینه ییخیلاراق، بیر مدت سونرا ایمپیچمنت ائدیلمه‌سی: بو، ایران سیاستینه یاد دئییل و موجود داخلی اعتراضلار فونوندا محافظه‌کارلارین «تمیزلنمه‌سی» مقصدیله بئله بیر سسناری استثنا ائدیلمه‌مه‌لیدیر؛

بو ایکی عاملله یاناشی، پزشکیان گئدیشی خامنه‌اینین محافظه‌کار قانادا «عزضله نمایشی» ده اولا بیلر. دینی لیدرین مطلق حاکمیتی نه قدر گوج‌لو اولسا دا، محافظه‌کار قاناد آراسیندا قارشیدورما پروبلملرین ده اولدوغونو تصدیق ائدیر. خامنه‌ای اوچونسه واجب اولان پستونون اوغلو مجتبی اؤتورولمه‌سی، یاخود ممکون دییشیکلیکده عائله‌سینین گرانتیا آلتینا آلینماسیدیر. استثنا دئییل کی، خامنه‌ای بو گئدیشله محافظه‌کار قانادا ایستدیی اولماسا، نه‌لرین باش وئره بیلجیینی گؤسترمک ایستییر.

بوتون حاللاردا پزشکیان عاملی حاضردا ایران سیاستینده کیلید نقطه‌یه چئوریلیب. و سئچکینین نتیجه‌لرینی پروگنوزلاشدیرماغی دا چتینلشدیریر.

بیر طرفده اصلاحات‌چیلاری اطرافیندا بیرلشدیرن و کوتلوی دستیی اولان پزشکیان، دیگر طرفده قالیبافین خیرینه چکیلمه‌لردن سونرا بئله بیر نئچه نامزدله مبارزه آپاران محافظه‌کارلار وار. بو عامل محافظه‌کار قانادین سسلرینین بؤلونمه‌سینه سبب اولاجاق. اوبیکتیو رئاللیقلاردا پزشکیانین سئچیلمه شانسی چوخ گؤرونسه ده، اونون رژیم اوچون یارادا بیلجیی تهلوکه سوبیکتیو رئاللیقلارین حل‌ائدیجی اولاجاغی احتمالینی اؤن پلانا چیخاریر. بونون فونوندا سئچکینین ۲-جی تورا قالاجاغی تخمینلرینی ایر‌لی سورمک ممکوندور:

- ۱-جی توردا طرفلر لازم اولان باریئری آشا بیلمه‌یه‌جک؛

- ۲-جی توردا محافظه‌کارلار بیرلشه‌جک، اساس نامزد بؤیوک احتماللا قالیباف اولاجاق و سئچکینی قازاناجاقلار؛

ممکون سناری بئله گؤرونور. داها آز احتمال اولسا بئله، پزشکیانین «قوربان وئریلمک» اوچون سئچیلمه‌سی واریانتی دا اونودولمامالی‌دیر. خامنه‌ای ایسه سئچکینین نتیجه‌سیندن آسیلی اولمایاراق، ایران داخیلینده‌کی قوه‌لره «نه‌لر ائده بیلجیینی» گؤستره بیلدی.