تورکیه جمهورباشقانی رجب طیب اردوغان تورک دولتلری تشکیلاتینین بیشکئکده کئچیریله‌ن زیروه توپلانتی‌سیندا ایکی گؤزلنتی‌سینی اورتایا قویوب. اردوغان قوزئی قیبریس تورک جمهوریتینین و تورکمنیستانین قیسا زمان‌دا تورک دولتلری تشکیلاتینا تام‌حقوقلو عضو اولمالارینی ایستدیینی بیلدیریب.

Axar.az خبر وئریر کی. بو سؤزلری پولیتولوق ائلخان شاهین‌اوغلو بیلدیریب.

او قید ائدیب کی، قوزئی قیبریسلا باغلی قرار عضو دولتلرین ایستییندن آسیلیدیر:

«تورکیه و آذربایجاندان باشقا دیگر تورک دولتلری قوزئی قیبریس تورک جمهوریتینین تشکیلاتا تام‌حقوقلو عضولویونه هله کی، احتیاطلا یاناشیرلار. قوزئی قیبریس تورک جمهوریتینین جمهورباشقانی ارسین تاتار شوشاداکی توپلانتیدان سونرا ایکینجی دفعه بیشکئکده‌کی توپلانتییا مشاهده‌چی استاتوسوندا قاتیلیب. مرکزی آسیا اؤلکه‌لری قوزئی قیبریس تورک جمهوریتی-نین مشاهده‌چی استاتوسونا اعتراض ائتمیرلر. آنجاق آنکارا و لفکوشا تام عضولوک ایستییر. اصلینده قوزئی قیبریس تورک جمهوریتی-نین تورک دولتلری تشکیلاتینا تام‌حقوقلو عضولویونه گؤره مرکزی آسیا اؤلکه‌لرینی تهلوکه گؤزلمیر. آمریکا و یا آوروپا بیرلیی دولتلری بو قرارا گؤره مرکزی آسیا اؤلکه‌لرینه سانکسییا تطبیق ائتمزلر. اونا گؤره مرکزی آسیانین تورک دولتلری یاخین ایللرده قوزئی قیبریس تورک جمهوریتی ایله باغلی قرار وئرمه‌لی اولاجاقلار.

تورکمنیستانین تشکیلاتا عضولویو ایسه عشقابادین قراریندان آسیلیدیر. قوزئی قیبریس تورک جمهوریتی-دن فرقلی اولاراق، تورکمنیستانین تورک دولتلری تشکیلاتینا عضولویونو قوروم‌داکی دولتلرین تمامی دستکله‌مه‌یه حاضردیر. بو دفعه تورکمنیستان تلسمه‌مه‌یه قرار وئریب».