اؤتن گون ایرانین ارمنیستان‌داکی سفیری مهدی سبحانینین ایروان‌دا کئچیردیی مطبوعات کنفرانسین‌دا آذربایجانا قارشی سسلندیردیی فکرلر گؤزلنیلمز دئییلدی. چونکی ئهدی سبحانینین ایرانین بعضی گروپلارینین الینده آذربایجانا قارشی «سؤزچو» فونکسییاسینی یئرینه یئتیردیی آرتیق هر کسه بللی‌دیر. «گؤزلنیلمز» اولان نیه بو مطبوعات کنفرانسینین محض ایندی کئچیریلمه‌سی و نیه اونون چیخیشینین بؤیوک اکثرینین یئنه ده زنگزور، ارمنیستانین تهلوکه‌سیزلیی و سایر مسئله‌لره «یؤنلمه»سیدی؟

مسئله اوندادیر کی، آذربایجان پرزیدنتینین کمکچی‌سی حکمت حاجییئوین ایرانا سفری یئنی باشا چاتیب و سفر دنیا مدیاسینین بئله دقتینی جلب ائدیب. حکمت حاجییئو خارجی ایشلر ناظیری عباس عراقچی و ملی تهلوکه‌سیزلیک اوزره عالی شورانین کاتبی علی اکبر احمدیانلا، همچنین ایران پرزیدنتی مسعود پزشکیانلا دا گؤروشلر کئچیردی و بو دا بین‌الخالق اکسپرتلرین گوندمینه دوشدو. ماراقلی‌دیر کی، محض بو گؤروشلردن سونرا آذربایجانین ایرانلا مناسبتلری «یئنیلدیی» حاقدا فکرلر سسلندیریلدی و بونون آردینجا نفوذلو بین‌الخالق مدیا قوروملاریندا بو «یاخینلاشمانین» هئچ ده آذربایجانین ماراقلارینی عکس ائتدیرمدیی حاقدا مؤقعلر سسله‌ندی. بئله گؤرونوردو کی، بو سفر و ایران‌داکی سفیرلییمیزه ترور هجومو ائد‌ن یاسین حسین‌زاده-نین اعدام جزاسینین عالی محکمه طرفیندن تصدیقله‌نمه‌سینین بو سفرله عینی واختا دوشمه‌سی - دئمه‌لی، آذربایجانین پرینسیپیال موقعیینین قبول ائدیلمه‌سی، - آستارا یوک ترمینالیندا ایشلرین سرعتله‌نمه‌سی، آذربایجانین غرب رایونلاری ایله ناخچیوانی بیرلشدیرن «آراز دهلیزی» – ایران‌دان کئچه‌ن یولون تیکینتی‌سینین گئدیشی و سایر اقتصادی-سیاسی و تجاری مناسبتلرده‌کی اورتاق ماراقلاردان چیخیش‌ائتمه استقامتینده جهدلر بعضی بین‌الخالق گوجلری، خصوصیله ایرانا قارشی اولانلاری قانع ائتمیر. چونکی آذربایجانا «توصیه» وئرن سؤزوگئدن شرح‌چیلر ایرانا دشمن دولتلری تمثیل ائدیرلر.

آنجاق آیدین اولدو کی، ایران-آذربایجان مناسبتلرینده یومشالما حتی ایرانین «قیرمیزی خطی»نی آیاقلاری آلتینا آلیب، ائلدن-ائله، بئله‌دن بئله تاپدایان و ایرانلا سرحده نه‌اینکی ۳-جو – آوروپا بیرلیی «میسیاسینی»، - هم ده ۴-جو – آمریکا سرحدچیلرینی – قوه‌نی یئرلشدیرمه‌یه حاضیرلاشان ارمنیستانا هله ده «استاوکا»یا داوام ائد‌ن ایرانین بعضی گوجلرینی ده «ناراحات» ائدیب.

دقت ائدین: سبحانی آوروپا بیرلیی «میسیاسی»نین اوزادیلماسی ایله باغلی ایضاحی «آنلادیغینی» بیلدیریر، ارمنیستان و آمریکا آراسیندا امضالانان استراتژی طرفداشلیغا دایر خارتییانین ایران-ارمنیستان مناسبتلرینه تأثیر ائتمیجییندن بحث ائدیر، گونئی آذربایجان‌لیلارین ایروانین مرکزینده «قاراباغ» ماهنی‌سی اوخوماسینی پیسلییر و سایر.

اولدوقجا ماراقلی‌دیر: سبحانی بیلمیرمی کی، آوروپا بیرلیی-نین «مشاهده میسیاسی» یالنیز کشفیات فعالیتی ایله مشغولدور؟ بو «میسیا»نین ترکیبینده سابق کشفیات‌چیلار و ضابطلرین اولدوغو رسمی شکلده اعتراف دا دئییل، اعلان ائدیلیب. بس، بو کشفیات‌چیلار ارمنیستان سرحدینده نه‌یین مشاهده‌سینی آپاریرلار؟

هر بیر حال‌دا بو کشفیات معلوماتلارینین آذربایجانا چوخ آز عایدیتی وار – آذربایجان اونسوز دا کفایت قدر آچیق اؤلکه‌دیر: قاپالی، حربی پتنسیالی دایم «یئر آلتیندا» اولان، نووه سلاحی یاراتماسی باره‌ده جدی شبهه‌لرین اولدوغو و عمومیتله حماس، حزب‌الله، بشار اسددن سونرا بوتون گؤزلرین «دیکیلدیی» اؤلکه ایران‌دیر. هر طرفدن ایران اطرافین‌دا حالقا دارالیر و بوتون کشفیات معلوماتلاری دا بو اؤلکه‌یه قارشی توپلانیر.

سبحانی همچنین اؤز اؤلکه‌سینین ان یوکسک سوییه‌ده دیله گتیریله‌ن و واختاشیری اولاراق سسله‌ندیریله‌ن ناراحاتلیغینی دا بیلممیش دئییل. ایران سرحدلرینده ۳-جو قوه‌نین اولماماسینی دفعه‌لرله سسلندیریب. ارمنیستانین آوروپا بیرلیی «میسیاسی»نین آردینجا ایرانلا سرحده آمریکا سرحدچیرینی گتیرمه‌یه اساس وئرن «استراتژی طرفداشلیق خارتییاسی»نی امضالاماسی سبحانینی نیه ناراحات ائتمیر؟ عکسینه، دولاییسی ایله بونو دستکلدیینی ایفاده ائدیر.

حالبوکی تهلوکه‌سیزلیک شوراسینین کاتبی احمدیان ائله اؤتن آی ارمنیستانا سفری زمانی جنوبی قافقازا ۳-جو اؤلکه‌لرین قوه‌لرینین یئرلشدیریلمه‌سینه اعتراضینی آچیق شکلده ایفاده ائتمیشدی و حتی اونون بو سؤزلری میرزویانین آمریکا سفریندن اؤنجه دئمه‌سی ایروانا خبردارلیق کیمی قبول ائدیلمیشدی. آنجاق بو خبردارلیقدان ۴ گون سونرا میرزویان حاکمیتی تحویل وئرمه‌یه حاضیرلاشان آمریکا آدمینیستراسییاسی ایله خارتییا امضالاییر، ایران سفیری ایسه مطبوعات کنفرانسیندا بونو دولاییسی ایله دستکلییر.

بئله گؤرونور کی، سبحانی فاکتیکی اولاراق ایندیکی ایران حکومتینین سیاستینه قارشیدیر!

کئچک، «قاراباغ» هواسینا: ارمنیستان رهبرلیینین اؤزو بیرجه دفعه ده اولسون ایروانین مرکزینده «قاراباغ» ماهنی‌سینین اوخونماسینی تنقید ائتمه‌ییب، عکسینه، او ایفانی چکیب، ملی نفرت حسینی اویاتماق اوچون بونو خصوصی شرحله یایان شخصه قارشی جنایت ایشی قالدیریب و حاضردا همین شخص – غریب بابایان – پلیسین نظارتینده‌دیر، پایلاشیملارینا قاداغا قویولوب، استنطاق ایسه داوام ائدیر.

یعنی ارمنیستان رهبرلیی ایروانین مرکزینده‌کی رسپوبلیکا میدانیندا «قاراباغ» ماهنی‌سی اوخویانلارا قارشی هر هانسی ایفاده ایشلتمیی بین‌الخالق حقوق نرمالاری باخیمیندان مقبول سایمیر، چونکی انساندیرلار و اوخویوبلار، آنجاق ایران سفیری سبحانی بونو «راسیزم و ملتچی‌لیک» آدلاندیریر.

قاراباغ – هر زمان آذربایجانین اولوب، بوتون بین‌الخالق تشکیلاتلار قاراباغی آذربایجانین ترکیب حصه‌سی ساییب؛ اوسته‌لیک، خامنه‌ای ده قاراباغین "مسلمان تورپاغی" اولدوغونو دیله گتیریب. همچنین ارمنیستان حاکمیتی ده ۲۰۲۲-جی ایلده رسمی اولاراق قاراباغین آذربایجانین ترکیب حصه‌سی اولدوغونو اعلان ائتدی و آذربایجانین اراضی بوتؤولویونو تانیدیغینی بیلدیردی، ایندی ده دلیمیتاسییا و دمارکاسییا پروسسی باشلاییب، قازاخین ۴ کندی گئری قایتاریلیب و سایر.

سبحانی نه‌اینکی بین‌الخالق قانون و نورمالارا، حتی تمثیل ائتدیی اؤلکه‌نین لیدری خامنه‌اییه ده، تمثیل اولوندوغونو اؤلکه‌نین رهبرینه ده… - یومشاق دئسک، ضد گئدیر، تمثیل ائتدیی و تمثیل اولوندوغو اؤلکه‌لرین قرارلارینی آیاقلارینین آلتینا آتیر، لیدرینی تحقیر ائدیر، آلچالدیر کی، تکی ارمنیستان‌داکی روانشیست-فاشیست عنصورلرین حیصه‌لرینه «سیغال چکسین»؟

بو، دیپلماتییادا قبول‌اولونماز بیر شی‌دیر. نرمال اؤلکه‌لر بئله حال‌دا نه‌اینکی سفیرینی گئری چاغیریر، اونو عمومیتله خدمتدن رد ائدیر.

یئری گلمیشکه‌ن، سبحانی ایله عینی واختدا سپاه عضوو ده ندنسه ارمنیستانین سرحدلرینین توخونولمازلیغی حاقدا بیانات وئرمیی لازم بیلدی. نه باش وئریر؟

بئله معلوم اولور کی، سبحانی و اونون آرخاسینداکیلاری ایرانین «قیرمیزی خطلری»نین تاپدانماسی، ایرانین تهلوکه‌سیزلیی و ایرانلا باغلی کشفیات معلوماتلارینین توپلانماسی، نتیجه‌ده، مثلاً، تهران‌دا حماس لیدرینین - ایران پرزیدنتینین آندایچمه مراسمینه گلن قوناق اسمائیل هنیه‌نین قتله یئتیریلمه‌سینه قدر "ائوینین ایچینه" گیریلمه‌سی، خامنه‌اینین سؤزلرینین عکسینه گئتمکله دولت سیاستینه حرمتسیز ائتمک، غیر-دیپلاماتیک آددیملارلا ایران دیپلوماتییاسینی لکه‌له‌مک و ایران سیاستینه اینامسیزلیق یاراتماق قطعی ناراحات ائتمیر.

بونلاری «ناراحات ائد‌ن» یالنیز آذربایجانلا ایران آراسیندا نرمال مناسبتلرین اولماسیدیر!

بو گروپ ایرانلا آذربایجان آراسیندا الده اولونان سون راضیلاشمالار و سازشلرین رئاللاشماسینا امکان وئررمی؟