آوگوستون ۲۰-ده آلمانیانین هامبورگ شهرینده مهاجر ایران‌لیلار اعداما محکوم ائدیلن آذربایجانلی ایشچی حرکاتی فعالی شریفه محمدی‌یه دستک آکسیاسی کئچیریبلر.

Axar.az خبر وئریر کی، بونونلا باغلی اینسان حاقلاری تشکیلاتلاری معلومات یاییب.

اللرینده شریفه محمدینین فوتولارینی داشیان یوزلرله شخص، تهران حکومتینی ایشچی حرکاتی فعالینین اعدام حؤکمونو لغو ائتمه‌یه، اونو سربست بوراخماغا چاغیریبلار.

اونلارلا آلمانیالی انسان حاقلاری فعالینین دا قوشولدوغو آکسیادا بین‌الخالق اجتماعیت‌دن محمدی‌نین حیاتینی خلاص ائتمک اوچون ایران حکومتینه تضییق گؤسترمه‌لری ایستنیلیب.

بونونلا یاناشی ،بین‌الخالق نقلیات ایشچیلری فدراسییاسی دا بیانات یایاراق، آذربایجان‌لی محبوسا دستک ایفاده ائدیب، تهران‌دان اونو آزاد ائتمیی ایسته‌ییب.

بین‌الخالق دستک بیاناتلارینین داوامین‌دا ب.ام.ت-نین ایران‌داکی انسان حاقلاری اوزره خصوصی معروضه‌چی‌سی مای ساتو دا اوخشار بیاناتلا چیخیش ائدیب.

ساتو، شریفه محمدینی باره‌سین‌ده اعدام حکمونون دایاندیریلماسینی طلب ائد‌رک، ایران محکمه سیستمینی اعدام جزاسینین آرادان قالدیریلماسینا چاغیریب.

بونونلا یاناشی بو.ام.ت-نین مستقل فاکت آراشدیریجی میسیاسی دا اوخشار بیاناتلا چیخیش ائدیب، ایران عالی محکمه‌سینین قرارینی پیسله‌ییب و اونون لغو ائدیلمه‌سینی طلب ائدیب.

قید ائدک کی، حاضردا رشت شهرینین لاکان حبسخاناسین‌دا ساخلانیلان شریفه محمدی حاقین‌دا بوندان اول چیخاریلان اؤلوم حکمونو ایران عالی محکمه‌سینین ۲۹-جو بؤلمه‌سی تصدیق ائدیب.

۵ دکابر ۲۰۲۳-جو ایلده حبس ائدیله‌ن شریفه محمدی "خاریج‌ده حکومته مخالیف اولان تشکیلاتا عضو اولماق"دا گناهلاندیریلیب و اعدام جزاسینا محکوم ائدیلیب.