آمریکانین ایر‌لی سوردویو ۴ اساس طلب ایرانین اصلا قبول ائده بیلمیجیی شرطلردیر. آمریکا ایرانا بو شرطلری قبول ائتدیرمه‌یه چالیشیرسا، دئمه‌لی، مقصدی آنلاشماق یوخ، هجوما کئچمک اوچون «سبب»، یعنی بهانه تاپماقدیر.

Axar.az خبر وئریر کی، بو سؤزلری پولیتولوق حیدر اوغوز ایران اطرافین‌دا یارانان سون پروسسلر حاق‌دا قید ائدیب.

«آبمریکانین ایلک شرطی نووه زنگینلشدیرمه‌سیندن ال چکمکدیر. ایران ایلک قورولدوغو ایللرده عراقلا گیردیی محاربه‌ده ۱ میلیون‌دان چوخ آدام ایتیردیکدن سونرا اؤزونون ان اعتبارلی مدافعه استراتگییاسینین نووه سلاحی اولدوغونو آنلادی و بو استقامت‌ده آددیملار آتماغا باشلادی. ایندی دوروب بیردن-بیره نووه ایستراتگیاسین‌دان امتنا ائتمه‌سی اونو یئنی‌دن ۱۹۸۰-جی ایللرده‌کی ضعیف وضعیته سالا و دشمن‌لرینی ایرانا هجوم ائتمه‌یه هوسلندیره بیلر. فکریمجه، تهران نیین باهاسینا اولورسا اولسون، نووه ایستراتگیاسین‌دان واز کئچمه‌یه‌جک.

آمریکانین ایکینجی طلبی ایرانین پروکسی قوه‌لردن امتنا ائتمه‌سی‌دیر. پروکسی قوه‌لره یؤنلمه‌سی ده ایرانین ان مهم مدافعه ایستراتگییالاریندان بیریدیر. ایران رسمیلرینین فکرینجه، یاخین شرقین مختلف یئرلرین‌ده فعالیت گؤستره‌ن و «مقاومت اوخو» آدلانان پروکسی قوه‌لر اونا ائدیله‌جک خاریجی هجوملاری سرحدلریندن کناردا قارشیلاماق ایمکانی وئریر. ایران اؤز پروکسیلریندن امتنا ائدرسه، مجبوره‌ن دوشمنی اؤلکه‌نین سرحدلری داخلینده قارشیلامالی‌دیر. بو ایسه بؤیوک داغینتیلارلا قارشیلاشماق معناسینا گلیر.

اوسته‌لیک، مسلمان اؤلکه‌لرین مختلف یئرلرینه باسدیریلمیش بو جان‌لی مینالار ایرانین بین‌الخالق مذاکره‌لرده تأثیر گوجونو آرتیریر، اونو بیر نوع رگیونال گوجه چئویریر. «مقاومت اوخو»ندان امتنا ایرانی رگیونال گوج مرکزیندن لوکال دولته چئویره بیلر کی، تهران بو تالع ایله باریشماق ایستمیر.

آمریکانین دیگر طلبی سپاه کیمی دینی رژیمه باغلی سلاحلی قوه‌لردن امتنادیر کی، حتی خامنه‌ای ایسته‌سه بئله، بو شرطی یئرینه یئتیره بیلمز. ایران اقتصادیاتینین ۶۰%-نی اؤز الین‌ده جمع‌لشدیره‌ن، سون زامانلار حتی نفت حاصلاتینین یاریسینی اله کئچیره‌ن سپاه دوشونولدویوندن داها گوجلودور.
دؤردونجو طلب ایسه بالستیک راکت احتیاطلارینی آزالتماق و اونلارین منزیلینی اسرائیلی وورا بیلمه‌یه‌جک قدر قیسالتماق‌دیر. ایران بونو دا ائتمز. چونکی اسرائیلی وورماق تهدیدی اونون الین‌ده بلکه ده اتم بمباسین‌دان داها گوجلو سلاحدیر. هر دفعه باشی آمریکا ایله درده گیره‌نده «مرگ بر اسرائیل» دئیه باغیریب، تل-اویوین و واشینگتن‌داکی یهودی لوبیلرینین اینجه دامارینا نئشتر سوخور. اونلار دا حرکته کئچیب آمریکا پرزیدنتلرینی اؤز یئرینده اوتوردورلار»، - پولیتولوگ وورغولاییب.

اوغوزون فکرینجه، بوتون بونلار آمریکانین ایر‌لی سوردویو طلبلرین ایرانین حقیقی قیرمیزی جیزگیلری اولدوغونو تصدیقلییر:

«تهران بو قیرمیزی جیزگیلرینی نیین باهاسینا اولورسا اولسون، قوروماغا محکومدور. آمریکانین دا اوندان قیرمیزی جیزگیلریندن واز کئچمه‌سینی طلب ائتمه‌سی اونو گؤستریر کی، دونالد ترامپ ایرانی وورماق اوچون بهانه آختاریر».