روسیا پرزیدنتی ولادیمیر پوتین فاشیزم اوزرین‌ده غلبه گونو مناسبتیله کئچیریلن تدبیرلردن سونرا کرملینده آیاق اوستو مطبوعات کنفرانسین‌دا اوکراینایا قارشی محاربه و یاخین شرق‌ده‌کی گرگین‌لیکدن دانیشارکن ارمنستانین باش ناظری نیکول پاشینیانا دا خبردارلیق مساژی گؤندرمیی اونوتماییب. کرملین صاحبی پاشینیانلا سون گؤروشونده اونا سؤیلدیینی بیر داها تکرارلاییب: «ارمنستان آوراسیا اقتصادی اتفاقین‌دا عضولوکله آوروپا بیرلیینه اینتئگراسییا کورسو آراسین‌دا سئچیم ائتمه‌لیدیر».

Axar.az خبر وئریر کی، بو سؤزلری پولیتولوگ الخان شاهینوغلو قید ائدیب.

«آنجاق ولادیمیر پوتین بو دفعه موضویلا باغلی ایکی علاوه‌سینی ده ائدیب. بیرینجی‌سی، روسیا پرزیدنتینین سؤزلرینه گؤره، ایروان آوروپا استقامتینی سئچجیی تقدیرده روسیا ایله «یومشاق و مدنی آیریلیق» باش وئره‌جک. ایکینجی‌سی، پوتین پاشینیانا ارمنستانین آوروپا اینتگراسیاسی مسلسیله باغلی رفرندوم کئچیرمیی تکلیف ائدیب. پوتین بونلاری دئیرکن، ارمنی جمعیتینه ده مساژ گؤندریب: «ارمنستان آوراسییا اقتصادی اتفاقین‌دا جدی اوستونلوکلر الده ائدیب». یعنی پوتین ارمنی جمعیتینی خبردار ائدیب کی، پاشینیان رفرندوم کئچیررسه و ارمنیلر آوروپا بیرلیینه اینتگراسیا کورسونا اوستونلوک وئررلرسه، ایتیره‌جکلری اولاجاق. پوتین بونو آچیق دئمه‌سه ده، روسیانین ارمنستانا ساتدیغی گازین قیمتینی قالدیراجاغینی دا نظرده توتوب.

نیکول پاشینیان پارلامنت سئچکیلرینده غلبه قازانارسا، ایلک نوبه‌ده کونستیتوسیانی دییشدیریب آذربایجانلا صلح سازشی امضالاماق و تورکیه ایله سرحدین آچیلماسینی و بو اؤلکه ایله تجارتین باشلاماسینی تعمین ائتمه‌یه چالیشاجاق. بونونلا پارالل اولاراق «ترامپ یولو»نون تیکینتی‌سینه باشلاناجاق. البته، نیکول پاشینیان روسیانین یئرینه آوروپا اتفاقی ایله اینتگراسیانی سئچمک ایستیر، آنجاق رئال‌لیق بودور کی، ایروان ایسته‌سه بئله، ارمنستان قیسا زمان کسیینده آوروپا بیرلییینین عضوو اولمایاجاق. بونو پاشینیان دا آنلاییر، پوتین ده. اونا گؤره ده پوتین «سئچیم ائت» طلبیله پاشینیانی کونجه سیخماغا و بو یوللا ارمنستان‌داکی رادیکال مخالیفتین الینی گوجلندیرمه‌یه چالیشیر»، - پولیتولوگ وورغولاییب.