ایلانداغ یازیسی تخمیناً ۳۰ ایل اول علم عالمینه معلوم اولوب. ایلک دفعه سووئت دورونده بؤلگه‌ده چالیشان گئولوقلار بو عابده باره‌ده علملر آکادمیاسینا معلومات وئریبلر.

Kult.az خبر وئریر کی، تاریخ علملری دوکتورو، پروفسور ولی باخشلیئو بیلدیریب کی، یازینین اؤیرنیلمه‌سی اوچون ماتریاللار ایتالیایا گؤندریلیب و بورادا آپاریلان تدقیقاتلار نتیجه‌سینده متن دشیفره ائدیله‌رک اوخونوب.

معلوم اولوب کی، کتابه ناخچیوانا شمال استقامتیندن یوروش ائد‌ن اورارتو حکمدارلاری ایله باغلیدیر.

"یازیدا اورارتو حکمداری ایشپونی و سونرادان حکمدار اولان اوغلو منوانین آدلاری چکیلیر. منبع‌ده قید اولونوب کی، اونلار ارزین کندیندن کئچه‌رک، همین دورده آرشین آدلاندیریلان اراضی واسطه‌سیله آراز چایینی آدلاییب پلوادی اؤلکه‌سینه گئدیبلر. بورادا تانری خالدینین و حکمدارین خانیمینین شرفینه قوربانلار تقدیم ائدیبلر".

عالم دئییب کی، اورارتولار ناخچیوانا بیر نئچه استقامتدن – هم شمالدان، هم ده ایندیکی سده‌رک بؤلگه‌سی طرفدن هجوملار تشکیل ائدیبلر:

"همین دورده اراضیده گوجلو طایفه اتفاقی - ایتونی کونفدراسیاسی موجود اولوب. بو سببدن اورارتولارین یوروشلری اوغورسوزلوقلا نتیجه‌لنیب و اونلار جنوبا دوغرو گئری چکیلمه‌یه مجبور اولوبلار".