سوئیس‌ده اردبیل ایالتینین خیاو (مشگین) شهرینده‌ن اولان آلپینیست، وکیل و شاعر مهری جعفرینین آنیم مراسیمی کئچیریلیب.

Axar.az خبر وئریر کی، بو حاق‌دا سوئیس‌ده یاشایان گونئی آذربایجان‌لیلار معلومات وئریب.

مراسیم‌ده بین‌الخالق آلپینیزم فدراسیاسینین عضولری، گونئی آذربایجانلی، آوروپالی و دنیانین مختلیف اؤلکه‌لریندن اولان آلپینیستلر اشتراک ائدیبلر.

مهری جعفرینین آلپینیزم ساحه‌سینده‌کی فعالیتلری باره‌ده دانیشیلیب، اونون خاطره‌سی آنیلیب.

قید ائدک کی، گونئیلی حقوق‌شناس، انسان حقوقلاری فعالی و آلپینیست مهری جعفری ۲۰۲۱-جی ایلین اوت آییندا قیرغیزیستان و چین سرحدینده یئرلشن، هوندورلویو ۷۹۳۹ متر اولان تهلوکه‌لی پابدا زیروه‌سیندن تک ائندیی زمان اوگوستون ۴-ده ۶۳۰۰ متر هوندورلوکدن ییخیلاراق ایتکین دوشوب.

اونون میتینین تاپیلماسی اوچون بریتانیا و مجارستان‌دان اولان ۳ نفرلیک آلپینیست گروپو آختاریش آپارسا دا، بو نتیجه وئرمه‌ییب.

جعفری ۷۰۱۰ متر هوندورلویو اولان خان تنگری زیروه‌سینه تک قالخان ایلک ایرانلی آلپینیست اولوب. او، بونونلا یاناشی جنوبی آمریکانین آند داغلارینین شیلی و بولیویا سرحددینده یئرلشن ۶۳۸۰ متر هوندورلویو اولان پاریناگوتا زیروه‌سینه ده تک قالخیب.

"سازیمی کؤکله‌ییرم" و "جاذبه قوه‌سیندن قورخمادان" شعر کتابلارینین مؤلفی اولان مهری جعفری بین‌الخالق آلپینیزم فدراسیاسینن بیر نئچه مکافاتینا لایق گؤرولوب.

حقوق اوزره باکالاور درجه‌سینی تهران اونیورسیته‌سینده آلان قادین آلپینیست، انسان حاقلاری ساحه‌سین‌ده‌کی فعالیتلرینه گؤره تهران رژیمینین تضییق و تعقیبلرینه معروض قالیب و بریتانیایا کؤچوب. اورادا دا تحصیلینی داوام ائتدیره‌رک اونیورسیتی اوف وست لندن ده ( غربی لندن اونیورسیته‌سی) بین‌الخالق بیزنس حقوقو اوزره ماگیستر درجه‌سینی، لندن‌ده‌کی وستمینستر اونیورسیته‌سینده ایسه حقوق لیسنزییاسینی آلیب.