مسعود پزشکیانین ۱۱ آوگوست ۲۰۲۴-جو ایل تاریخینده ناظرلر کابینتینین ۱۹ نفرلیک سیاهیسینی اسلام شوراسی مجلیسینه (پارلامنته) رسمی اولاراق تقدیم ائتمهسی و بونونلا دا ۱۴-جو حکومتین اعتماد سسوئرمهسی پروسسینی باشلاتماسی اؤلکهنین سیاسی تاریخینده مهم بیر حادثه اولدو.
لاکین بو اجرا ائدیجی آددیما باخمایاراق، ایران اسلام رسپوبلیکاسیندا پرزیدنتلیک اینستیتوتو معاصر دموکراتیک سیستملردن فرقلی اولاراق، اجرا ائدیجی حاکمیتین رهبری کیمی گؤرونسه ده، حقوقی، دینی و ایستروکتور بلوکادالار سببیندن اؤلکهنین عمومی وضعیتینه تام نظارت ائتمک قابیلیتیندن محرومدور.
بو ایستروکتور محدودیتینین تملی کونستیتوسییانین قورولوشوندا، خصوصیله بوتون حاکمیت قوللارینین لگیتیملیینی بوتؤولشدیرن ویلایت فقیه پرینسیپینده دایانیر.
کونستیتوسیانین ۱۱۰-جو مادهسی سلاحلی قوهلرین عالی کوماندانلیغی، عالی محکمه، کشفیات و رسمی مئدیا رهبرلرینین تعیناتی، محاربه و صلح اعلان ائدیلمهسی کیمی سوورنلیین ان مهم آلتلرینی بیرباشا رهبره حواله ائتدییندن، پرزیدنت ماکرو-سیاستی معین ائدن شخص دئییل، یالنیز عالی انستانسییالار طرفیندن حاضرلانمیش قرارلارین اجراچیسی ایستاتوسوندادیر.
حتی ۱۹۸۹-جو ایلده باش ناظر پوستونون لغو ائدیلمهسی ایله اجرائدیجی حاکمیت پرزیدنتین رهبرلیینده بیرلشدیریلسه ده، پارالل اولاراق کونستیتوسییا کئشیکچیلری شوراسی و نظام-انتظام شوراسی کیمی تعیین اولونموش اورگانلارین نظارت گوجو آرتیریلمیش، پرزیدنت فاکتیکی اولاراق اؤلکهنین باش بودجه منجری سویهسینه ائندیریلمیشدیر.
حقوقی آرنادا کونستیتوسیانین ۱۱۳-جو مادهسی پرزیدنتی اؤلکهنین ایکینجی عالی شخصی و کونستیتوسییانین اجراسینا مسئول شخص کیمی تانیتسا دا، کئشیکچیلر شوراسینین رسمی تفصیرلری بو صلاحیتی یالنیز ناظرلیکلرین داخلی ایستروکتورو ایله محدودلاشدیرمیش، پرزیدنتین پارلامنت و محکمهیه خبردارلیق ائتمک حقوقونو الیندن آلمیشدیر. عینی زماندا، شورانین تطبیق ائتدیی "استصوابی نظارت" مکانیزمی سئچکی مرحلهلرینده ثمرهلی و اصلاحاتچی نامزدلرین صلاحیتلرینی سیستملی شکیلده رد ائدرک پرزیدنتین اطرافینداکی الیتانین سیلینمهسینه رواج وئریر. بو حقوقی دالانلار اقتصادی ساحهده داها درین بیر "قارا قوتو" ایله بیرلشیر؛ آستان قدس رضوی، امام خمینی فرمانلارینین اجراسی قرارگاهی (ستاد)، مستضعفلر فوندو و اوقاف تشکیلاتی کیمی رهبرلییه باغلی نهنگ دینی-اقتصادی کارتلر عمومی داخلی محصولون بؤیوک حصهسینه و ایستراتژی ساحهلره نظارت ائدیر. بو هولدینگلر شریعت حکملرینه اساسلاناراق وئرگی توخونولمازلیغینا مالکدیرلر و حسابلاما پالاتاسی طرفیندن یوخلانیلمادیقلاری اوچون شفافلیقدان اوزاقدیرلار. بو ایسه حکومتین پول-کردیت پلانلاشدیرماسینی ایفلیج ائدیر.
حتی کونستیتوسییانین ۴۴-جو مادهسی چرچیوهسینده رئاللاشدیریلمالی اولان اؤزللشدیرمه پلانلاری دولت آکتیولرینین رئال اؤزل سکتور عوضینه بو دینی-حربی فوندلارا دؤور ائدیلمهسی ایله "خوسولتیلشدیرمه" فئنومئنینه چئوریلمیشدیر؛ نتیجهده موسسیسهلرین منفتی خزینهدن چیخسا دا، ایشچی تتیللری و بورج بحرانلارینین هئساباتلیلیغی یئنه ده پرئزیدئنتین اوزرینه یوکلنیر.
دیگر طرفدن، قانون لایحهلرینین مالیهلشدیریلمهسینده حکومت تحصیل و صحیه اوچون اجتماعی تضییق آلتیندا ایکن، حوزهٔ علمیهلرینه (دینی مدرهسهلر – رئد.) حدیندن آرتیق شیشیردیلمیش بودجهلر آییرماغا مجبور ائدیلیر و بو دینی قوروملار دؤولت بودجهسی ایله اؤز کادرلارینی حاضرلاییب ناظرلیکلرین تابعلیینده اولان موسسهلره پداگوگ و یا حاکم کیمی تعیین ائتدیرهرک بوتؤو اداره ائتمهنی اله آلیرلار.
- پرزیدنتلرین مدرنلشمه و یا سوسیال اصلاحات جهدلری هر زمان قم دینی شبکهسینین و مجتهدلرین فتوا سدلرینه دییب ایفلاسا اوغرامیشدیر؛
- ۲۰۰۶-جی ایلده قادینلارین ایستادیونا گیریشی سرانجامینین لغوی،
- ۲۰۱۶-جی ایلده دینی شهرلرده کونسرتلرین قاداغان ائدیلمهسی نتیجهسینده مدنیت ناظرینین استعفاسی، ائلجه ده اف.ای.تی.اف و یونسکو-نون ۲۰۳۰-جو ایل سندی کیمی بینالخالق مالیه و حقوق لایحهلرینین "کافرلرین حکمرانلیغی" آرقومنتی ایله آرخیولشدیریلمهسی بونون ان بارز نمونهلریدیر.
بو شبکهنین رسمی پلاتفورماسی اولان جمعه نمازی تریبونالاری ایسه سیستمله همرای اولمایان حکومتلرین دورونده رادیکال گروپلاری حرکته گتیرهرک داغیدیجی مخالفت رولونو اویناییر، لاکین محافظهکار حکومتلرین دورونده عینی اقتصادی بحرانلاری "الاهی امتحان" کیمی اساسلاندیریر.
ایستروکتورون ایفلیج پروسسی عالی مدنی انقلاب شوراسی و ویرتوال مکان شوراسی کیمی تعیین اولونموش اورگانلارین قانوندان کنار قرارلاری ایله اینترنت و اونیورسیتتلر اوزریندهکی نظارتین حکومتین الیندن آلینماسی ایله داها دا درینلشیر.
اداره ائتمهنین داخلی قاتلاریندا ایسه "کولگه دولت" کیمی فورمالاشمیش دایمی بوروکراتلار و تهلوکهسیزلیک شبکهسی، اصلاحاتچی پرزیدنتلرین سرانجاملارینی گیزلی تخریباتلارلا دوندورور.
بو تشکیلاتی تنهالیق اؤلکهده رئال پارتیا سیستمینین اولماماسی ایله بیرلشدیکده، پرزیدنت سئچکیدن سونرا کابینتی فورمالاشدیرماق اوچون مختلف فراکسیالارا گذشتلر وئرمهیه و فرقلی گوج مرکزلرینه باغلی ادارهچیلرله ایشلهمهیه مجبور قالیر.
اوستهلیک، سو، اکولوگییا و انرژی بحرانلاریندا یئرلی مافییالارین و ملت وکیللرین رگیونال ماراقلاری تعمین ائتمک اوچون تضییقلری حکومتی چارهسیز قویور، لاکین اکولوژی فسادلارین سوسیال اعتراض یوکو یئنه ده اجرائدیجی حاکمیتین اوزرینه دوشور.
استراتژی خاریجی سیاستین "مقاومت اوخو" دکتریناسی اطرافیندا و حربی کوماندانلیغین نظارتینده آپاریلماسی پرزیدنت و خارجی ایشلر ناظرلیینی سانکسیالارین لغو ائدیلمهسی پروسسینده صلاحیتسیز قویور؛ چونکی حکومت اقتصادی جانلانما و بینلخالق ایستاندارتلارا اینتگراسیا ایستهسه ده، حربی-دینی ایستروکتور رسورسلاری شیعهلیین ترانس میللی درینلیینه یؤنلدیر.
بو ضدیتی تماملایان اساس ریچاقلاردان بیری ده مطلق مئدیا مونوپولییاسینا مالیک اولان صدا-سیما تشکیلاتیدیر. رهبری بیرباشا عالی رهبر طرفیندن تعیین اولونان بو مئدیا نهنگی دولتدن ان بؤیوک بودجهنی آلماسینا رغما حکومته حسابات وئرمیر، مثبت ناعیلیتلری سنزورا ائدیر، تنقیدچیلره گئنیش تریبونا آچیر و رقمسال پلاتفورمالارین لیسنزییاسینی ساترا (سوسیال مئدیایا دولت نظارتی قورومو) واسطهسیله اله کئچیرهرک آلترناتیو مدنیت سیاستینی بوغور.
قانون وئریجیلیک اورگانی اولان پارلامنت ایسه سینرژی یاراتماق عوضینه، ملت وکیللرین سوبیکتیو طلبلری ایله ناظرلری ایمپیچمنت تهدیدی آلتیندا ساخلاییر و ۲۰۲۰-جی ایلده قبول ائدیلن "استراتژی فعالیت قانونو" کیمی قرارلارلا حکومتین دیپلماتیک مانور امکانلارینی تمامیله محدودلاشدیریر.
نهایت، ماکرو-اقتصادیاتدا مرکزی بانکین مستقیللیینین اولماماسی و سوورنلیین خرجلرینی اؤدمک اوچون پول چاپ ائدیلهرک ایستروکتور اینفلیاسییاسینین یارادیلماسی، هابله مفلس اولموش پنسیا فوندلارینین میلیاردلیق یوکونون دولت بودجهسینه یوکلهنمهسی پرزیدنتی مالیه پاسیولیینه سوروکلییر.
تهلوکهسیزلیک و محکمه سیستمینین سیاسیلشمهسی ایسه اؤزل سکتور صاحیبکارلارینا قارشی سوبیکتیو جنایت ایشلرینین آچیلماسی ایله اؤلکهدن کاپیتال چیخاریلماسینی سرعتلندیریر؛ محکمه حاکمیتی بؤیوک فوندلارین و حربی کارتلرین کوروپسییاسینا گؤز یومسا دا، جمعیت پولون دیردن دوشمهسینین و کوروپسیانین رئال فسادلارینی موجود پرزیدنتین فعالیتینده گؤرور.
بوتون بو مرکب منظره ثبوت ائدیر کی، ایراندا پرزیدنت میلیونلارلا سس قازانماسینا باخمایاراق، الاهی لگیتیملیین خالقین سسیندن اوستون توتولدوغو، گوجون ایسه تعیین اولونموش دینی، حربی و مئدیا شبکهلرینین الینده جمعلشدیی بو دوالیست سیستمده یالنیز بیر "تدارکچو" موقعیندن ایرلی گئده بیلمیر.
.jpg)
