اورمییا شهرینین ایران پارلامنتیندکی میللت وکیلی نادیر قاضیپور اورمییه-سرو خصوصی اقتصادی منطقه‌سینین فعالیته باشلاماماسینین سببینی آچیقلاییب.
آخار. آذ خبر وئریر کی، او، «تسنیم» خبر آگنتلیینه آچیقلاماسیندا آزاد تیجارت زوناسینین و خصوصی اقتصادی منطقه‌لرین جغرافی خریطه‌لرینین حکومت طرفیندن حاضیرلانیب پارلامنته گؤندریلمه‌لی اولدوغونو بیلدیریب:
«لاکین بئله بیر خریطه حاضیرلانمادیغی اوچون پارلامنت‌ده بو مسئله ایله باغلی غیری-معین وضعیت یارانیب. بوندان اؤنجه پارلامنتین اقتصادی کمیسییاسین‌دا اورمییه-سرو خصوصی اقتصادی منطقه‌سینین مسئله‌سی مذاکیره اولونوب و بو باره‌ده قرار قبول ائدیلیب. ایندی پارلامنت حکومتین جغرافی خریطه‌سینی گؤزلییر».
نادیر قاضیپور همچینین خصوصی اقتصادی منطقه‌نین آدینا آیدینلیق گتیریب:
«۹-جو پارلامنت منیم تکلیفیم اساسیندا سرو خصوصی اقتصادی منطقه‌سینین آدینین دییشدیریلمه‌سینی مذاکیره ائدیب و اونون «اورمییه-سئرو خصوصی اقتصادی منطقه‌سی» آدلاندیریلماسینا قرار وئریب».