مشکین شهر شهرینده شورا سئچکیلرینین نتیجه‌سی دییشیب.

آخار. آذ «سفیرمشکین»ه ایستینادا خبر وئریر کی، مشکین شهرده سئچکیلردن ۱۰ گون کئچدیکدن سونرا عوض ائدیجی شورا عضولریندن بیرینین اعتراضی اساسیندا بعضی صاندیقلارین سسلری یئنی‌دن ساییلیب، بونون نتیجه‌سینده رحیم فرجی عوض ائدیجی عضولر سیراسیندان چیخاریلاراق اساس عضولر سیاهیسینا، حیدر محمد حسینی ایسه جمعی ۳۲ سس فرقله اساس عضولر سیاهی‌سیندان چیخاریلاراق عوض ائدیجیلر سیاهیسینا داخیل ائدیلیب.
پروبلم سسلرین یئنیدن ساییلماسی ایله اؤز حلینی تاپماییب. بو دفعه حیدر محمد حسینی اعلان اولونان نتیجه‌یه کسکین اعتراض ائدیب. مسئله‌یه محکمه اورگانلارینین باخاجاغی گؤزلنیلیر:

«سسلرین یئنی‌دن ساییلماسینی میللت وکیلی و اعتراضچی نامیزد حیدر محمد حسینی اولمادان تکجه غالیب چیخان نامزد مشاهده ائدیب. اونا گؤره ده حیدر محمد حسینی نتیجه‌نین دییشمه‌سینی قبول ائتمیر و محکمه اورگانلاریندان مسئله‌یه باخیلماسینی طلب ائدیر»، - دئیه اعتراض ائد‌ن نامیزدین یاخینلاریندان بیری دئییب.

آشاغیدا مشکین شهر شهر شوراسی سئچکیلرینین اعلان اولونان سون نتیجه‌سی تقدیم اولونور:

اساس عضولر:

۱. سمییه زایدی خیاوی – ۱۰۶۳۰ سس

۲. ولی حیدرزاده - ۸۷۳۶ سس

۳. فریدون محمدی - ۸۶۸۶ سس

۴. سعید جیره - ۷۲۰۲ سس

۵. باقر فرامرزی - ۷۱۹۲ سس

۶. سید عسگر عطایی - ۶۹۹۸ سس

۷. رحیم فرجی - ۶۱۹۵ سس

اوزئدیجی عضولر:

۱. حیدر محمد حسینی – ۶۱۶۳ سس

۲. سجاد (وفا) حمیدزاده - ۵۹۱۲ سس

۳. بؤیوک سفرزاده - ۵۸۳۹ سس

۴. سلیم زحمت دوست - ۴۹۴۰ سس

خاتیرلاداق کی، ایران‌دا پرئزیدئنت و شهر شوراسی سئچکیلری مایین ۱۹-دا کئچیریلیب.