اورمودا ۵۰ مین تون آلما سویوق آنبارلاردا چورودو، خیاودا آلما باغی اولان بیر اکین‌چی باغینین آلما آغاجلارینینین بوتونونو دوغرادی. مغاندا ساریمساق اکین‌چی‌سی محصولونو چیخارمادان شوخوملادی، شبیستر هولوسو ۱۵۰۰-ه ساتیلیر کی، اکینچینین ایشچی هزینه‌لرینی بئله اؤدمیر. یوزلرله بو تیپ خبرلر هر ایل گؤزوموزو یاشاردیب، گونئی آذربایجان اکین‌چیلرینی یوخسونلاشدیریر. البته، بونلارین آرخاسین‌دا بیر سیاست دایانمالیدیر. بو مؤضوعنو آراشدیرارکن نلره راست گلدیک؟

تبریزین ۱-جی و ۴-جو دور میللت وکیلی اولان محمد علینژاد ساریخانی دئییر:

«چالیشیردیق اکین‌چی‌لیک وزارتی اورمو گؤلو اطرافین‌دا پوسته عکسین. آنجاق بو ایش هئچ زامان باش توتمادی. اوستانین اکین‌چی‌لیک مدیر کلو و اکین‌چی‌لیک وزیری بیزه دئدی کی، رفسنجانی بیزه دستور وئریب، آذربایجان‌دا پوسته اکیلمه‌سین».
بلی، بو، اکینچیمیزین باشینا گلن مینلرله اویون و سیاستین یالنیز بیر نمونه‌سی‌دیر. ایرانین مرکزچی حاکملری منفعت‌لی محصوللارین اکیمینی فارس بؤلگه‌لرینه عایید ائدیبلر. آذربایجان‌دا ایسه قیمتی مین تومن اولان یئرالماسی کیمی محصوللاری بجریرلر. نتیجه‌سینی بو گونلر خبرلرده اوخویوروق. بئله کی، ۱۳۹۶-جی ایلین مهر آیین‌دا اردبیلین منطقه سو شیرکتینین مدیر عاملی دئییر:

«اردبیلین ایستاندارد سو ظرفیتین‌دن ۵ دفعه داها چوخ سو مصرف ائدیلیر».

اردبیلین اکین‌چی‌لیک آراشدیرما مرکزینین اعلامینا اساساً، اردبیل اوستانینین اکین‌چی‌لیک محصولارینین ایللیک تولیدی ۱۲۲ میلیون تونا چیخیب.